काभ्रे र इलामका किसानले अब मोबाइलमै मौसमको पूर्वानुमान, कृषि बीमा र बजारको जानकारी पाउने भएका छन्। नेपाल सरकार, संयुक्त राष्ट्रसंघीय खाद्य तथा कृषि संगठन (एफएओ) र चीन सरकारको त्रिपक्षीय साझेदारीमा ‘नेपालमा कृषि-खाद्य प्रणाली सुदृढीकरण’ परियोजना सुरु भएको छ।
यो २४ महिने परियोजनाले पहाडी तथा हिमाली क्षेत्रमा जलवायु-उत्थानशील कृषि खेती, ग्रामीण जीविकोपार्जन सुधार र खाद्य तथा पोषण सुरक्षालाई सुदृढ बनाउने लक्ष्य राखेको छ। चीनको ग्लोबल डेभलपमेन्ट एन्ड साउथ-साउथ कोअपरेसन फन्डले यस परियोजनालाई आर्थिक सहयोग गरेको छ।
परियोजनाले स्थानीय संस्थाको क्षमता अभिवृद्धि गर्नेछ। यसले जलवायु-स्मार्ट कृषि, पोषण सुधार, डिजिटल नवप्रवर्तन र समावेशी ग्रामीण विकासमा सहयोग पुर्याउनेछ। यस सहकार्यले अन्तर्राष्ट्रिय प्राविधिक ज्ञान र अनुभव आदानप्रदान गर्नेछ। यसबाट स्थानीय नेतृत्वमा कृषि तथा खाद्य प्रणालीको दीर्घकालीन रूपान्तरण हुने अपेक्षा छ।
कृषि, वन तथा पर्यावरण मन्त्री गीता चौधरीले परियोजनाको उद्घाटन गरिन्। कार्यक्रममा नेपालका लागि चिनियाँ राजदूत माओमिङ झाङ, एफएओका प्रतिनिधि केन शिमिजु र एफएओ पिएसटीकी निर्देशिका हुआ याङ सहभागी थिए। संघीय, प्रदेश र स्थानीय तहका प्रतिनिधि पनि उपस्थित थिए।
मन्त्री चौधरीले यो परियोजनाले खाद्य सुरक्षा, ग्रामीण समृद्धि र दिगो विकासका राष्ट्रिय लक्ष्य हासिल गर्न सहयोग गर्ने बताइन्। राजदूत झाङले कृषि आधुनिकीकरणमा चीनको निरन्तर सहयोग रहने प्रतिबद्धता जनाए। एफएओकी निर्देशिका याङले यसलाई दक्षिण-दक्षिण सहयोगको सफल नमुना भनिन्।
परियोजना काभ्रेपलाञ्चोक र इलाम जिल्लामा कार्यान्वयन हुनेछ। डिजिटल कृषि विस्तार सेवामार्फत किसानलाई प्राविधिक परामर्श, मौसम सूचना, वित्तीय सेवा, कृषि बीमा र बजार जानकारी मोबाइलमै उपलब्ध गराइनेछ।
यसले महिला, युवा र सीमान्तकृत समुदायको सहभागिता बढाउनेछ। स्थानीय तहमा जलवायु अनुकूलन क्षमता सुदृढ पार्ने लक्ष्य राखिएको छ।
