अमेरिकी राष्ट्रपति डोनाल्ड ट्रम्पले क्यानाडाबाट आयात हुने अधिकांश वस्तुमा ५० प्रतिशतसम्मको महसुल (ट्यारिफ) लगाउने घोषणा गरेका छन्। यो कदमले उत्तर अमेरिकाका दुई प्रमुख छिमेकी राष्ट्रबीचको व्यापारिक सम्बन्धमा नयाँ तनाव थपेको छ।
यो नयाँ महसुल आगामी ३० दिनभित्र लागू हुनेछ। अमेरिकी कार, दुग्धजन्य पदार्थ र मदिरा जस्ता क्यानाडाली उत्पादनहरूमाथि असमान व्यवहार गरेको आरोप ट्रम्प प्रशासनले लगाएको छ। बीबीसीका अनुसार यसले दुई देशबीचको व्यापारिक तनावलाई थप तीव्र बनाउनेछ।
यस विषयमा प्रतिक्रिया दिँदै क्यानाडाका प्रधानमन्त्री मार्क कार्नीले आगामी हप्ताहरूमा अमेरिकासँगको व्यापार वार्तालाई अझ तीव्र रूपमा अघि बढाउन क्यानडा तयार रहेको बताएका छन्।
नयाँ महसुलको दायरामा वाइन, हक्की स्टिक जस्ता दैनिक उपभोग्य वस्तुदेखि व्यावसायिक सिमेन्ट जस्ता औद्योगिक सामग्रीहरू समेत परेका छन्। यद्यपि, ऊर्जा, पोटास, अत्यावश्यक खनिज पदार्थ र माछा जस्ता क्यानाडाका प्रमुख निर्यातजन्य वस्तुहरूलाई भने यस महसुलबाट छुट दिइएको छ।
अमेरिका, क्यानाडा र मेक्सिकोबीच रहेको हालको मुक्त व्यापार सम्झौता (NAFTA) अन्तर्गत पर्ने वा नपर्ने जेसुकै भए पनि तोकिएका सबै वस्तुहरूमा यो नयाँ महसुल लागू हुने बताइएको छ।
प्रधानमन्त्री कार्नीले सामाजिक सञ्जाल एक्समार्फत जारी गरेको विज्ञप्तिमा भनेका छन्, “क्यानडा–अमेरिका–मेक्सिको सम्झौताको प्रत्यक्ष उल्लंघन गर्दै अमेरिकाले एकपक्षीय व्यापारिक कदमहरूको शृंखला अघि बढाएको छ। यो त्यसकै पछिल्लो उदाहरण हो।”
सोमबार घोषणा गरिएका यी आयात शुल्कहरूले दुई देशबीच पहिलेदेखि नै कायम रहेको व्यापारिक अवरोधलाई थप बढाएको छ। यसअघि पनि अमेरिकाले क्यानाडाबाट आयात हुने स्टिल, आलमुनियम र तामामा १५ देखि ५० प्रतिशतसम्म ट्यारिफ लगाउँदै आएको थियो। यसबाहेक क्यानाडाली सफ्टवुड काठमा ३५ प्रतिशत तथा कारका गैर–अमेरिकी पार्टपुर्जाहरूमा २५ प्रतिशत आयात कर पनि कायम छ।
जवाफी कारबाही स्वरूप क्यानाडाले पनि अमेरिकी स्टिल, आलमुनियम तथा केही सवारीसाधनको आयातमा २५ प्रतिशत ट्यारिफ लगाउँदै आएको छ। सोमबारको यो पछिल्लो निर्णय क्यानाडाबाट फैलिएको डढेलोको धुवाँ अमेरिकी सहरहरूमा पुगेको विषयलाई लिएर राष्ट्रपति ट्रम्पले ट्यारिफ लगाउने चेतावनी दिएपछि आएको हो। यद्यपि, ट्रम्पले सोमबार हस्ताक्षर गरेको कार्यकारी आदेशमा डढेलो वा त्यससँग सम्बन्धित कुनै विषयको उल्लेख गरिएको छैन।
