आर्थिक वर्ष २०८२/०८३ मा नेपालले विद्युत् निर्यातबाट २९ अर्ब ३२ करोड ४७ लाख रुपैयाँ आम्दानी गरेको छ। यो आम्दानीले आयात खर्चलाई उछिनेपछि ऊर्जा क्षेत्रमा १८ अर्ब ७६ करोड ४८ लाख रुपैयाँको खुद व्यापार बचत भएको छ।
नेपाल विद्युत् प्राधिकरणका अनुसार समीक्षा वर्षमा नेपालले भारत र बङ्गलादेशमा ३ अर्ब ८७ करोड ७४ लाख ९२ हजार युनिट विद्युत् निर्यात गर्यो। यो अघिल्लो आर्थिक वर्षको तुलनामा झन्डै ६८ प्रतिशत बढी हो।
यता, बाह्य स्रोतबाट हुने विद्युत् आयात भने घटेको छ। समीक्षा वर्षमा १ अर्ब १४ करोड ९८ लाख युनिट विद्युत् आयात गर्दा १० अर्ब ५५ करोड ९९ लाख रुपैयाँ खर्च भयो। यो अघिल्लो वर्षको तुलनामा १८.२९ प्रतिशत कम हो।
निर्यात आम्दानी र आयात खर्चबीचको अन्तरले नेपालले विद्युत् व्यापारबाट मात्रै १८ अर्ब ७६ करोड रुपैयाँभन्दा बढी खुद बचत गर्न सफल भएको हो। अघिल्लो आर्थिक वर्षमा यो बचत ४ अर्ब ५३ करोड ५७ लाख रुपैयाँ थियो।
प्राधिकरणका अनुसार जलविद्युत् उत्पादनमा वृद्धि, सीमापार प्रसारण पूर्वाधारको विस्तार र प्रभावकारी ऊर्जा व्यवस्थापनले नेपाललाई दक्षिण एसियामा नाफामूलक ऊर्जा निर्यातकर्ताका रूपमा स्थापित गरेको छ।
