सिरहा र सुनसरीमा हालै भएको हिंसात्मक झडपमा मृत्यु भएका चार जनाको सम्झनामा संयुक्त श्रद्धाञ्जली सभा आयोजना गरिएको छ। साम्प्रदायिक तनाव अन्त्य गरी सामाजिक सद्भाव पुनर्स्थापित गर्ने उद्देश्यले उद्योग व्यापार संघ गोलबजारले बिहीबार हिन्दु र मुस्लिम समुदायको संयुक्त सहभागितामा कार्यक्रम गर्यो।
घटनापछि हिन्दु र मुस्लिम समुदायबीचको अविश्वास अन्त्य गर्दै शान्तिपूर्ण सहअस्तित्व कायम गर्ने सन्देश दिन कार्यक्रम आयोजना गरिएको थियो। सुनसरीका तीन र सिरहाका एक मृतकप्रति श्रद्धाञ्जली अर्पण गरियो। दुवै समुदायका प्रतिनिधिले शान्ति, सहिष्णुता, आपसी विश्वास र सामाजिक एकता सुदृढ बनाउने प्रतिबद्धता व्यक्त गरे।
साउन १० गते सुनसरीको देवानगञ्जमा भएको घटनामा ओमप्रकाश मेहता, जयप्रकाश मेहता र रवीन्द्र मेहताको मृत्यु भएको थियो। साउन १४ गते सिरहाको गोलबजारमा प्रदर्शनका क्रममा किशोर गणेश यादवले ज्यान गुमाएका थिए।
