सर्लाहीको कौडेना गाउँपालिका–१, लक्ष्मीपुरमा प्रहरीले करिब ३०० किलोग्राम गाँजा बरामद गरेको छ। जिल्ला प्रहरी कार्यालय सर्लाहीको विशेष टोलीले स्थानीय बिजन पटेलको घरमा खानतलासी गर्दा १५ बोरामा लुकाइराखेको गाँजा फेला पारेको हो।
भदौ २ गते राति करिब १०:१५ बजे विशेष सूचना पाएपछि प्रहरी टोलीले उक्त घरमा छापा मारेको थियो। बाँस र टालीले बनेको भुस राख्ने घरभित्र गाँजा लुकाइराखेको पाइएको जिल्ला प्रहरी कार्यालय सर्लाहीले जनाएको छ।
प्रहरी प्रवक्ता एवं प्रहरी नायव उपरीक्षक वेद प्रसाद गौतमका अनुसार, बरामद गरिएको गाँजा कसको हो भन्ने विषयमा थप अनुसन्धान भइरहेको छ। प्रहरी टोली पुग्दा घरधनी बिजन पटेल फरार रहेकाले उनको खोजी कार्य तीव्र पारिएको छ।
यस क्षेत्रमा यसअघि पनि प्रहरीले ठूलो परिमाणमा गाँजा बरामद गरेको थियो। लागूऔषध गाँजाको ओसारपसारको केन्द्र बनेको यस गाउँलाई प्रहरीले उच्च निगरानीमा राखेको छ।
