बाराको सिमरामा तीन वर्षीया बालिका गरिमा चौधरीको बलात्कारपछि हत्या प्रकरणमा आरोपित किशोरको बयान कक्षभित्र खिचिएको संवेदनशील भिडियो सामाजिक सञ्जालमा भाइरल भएको छ। यो घटनाले प्रहरीको अनुसन्धान प्रक्रिया र गोपनीयतामाथि गम्भीर प्रश्न उठाएको छ।
भिडियो सार्वजनिक भएपछि प्रहरी हवल्दार कुमार विकलाई पक्राउ गरी जिल्ला प्रहरी कार्यालय बाराको हिरासतमा राखिएको छ। प्रहरीको आन्तरिक अनुसन्धानले भिडियो प्रहरीबाटै सार्वजनिक भएको देखाएपछि विकलाई नियन्त्रणमा लिइएको हो।
बारा प्रहरीका एसपी नरेन्द्र कुँवरका अनुसार विकविरुद्ध गोपनीयताको अधिकार हनन गरेको कसुरमा फौजदारी कारबाही अघि बढाउने तयारी छ। अनुसन्धानबाट विकले भिडियो आफ्ना साथीलाई म्यासेन्जरमा पठाएको र त्यहीँबाट भाइरल भएको खुलेको छ।
भिडियो खिचिएको समयमा बयान कक्षमा अन्य पाँच जना प्रहरीको पनि उपस्थिति थियो। ती प्रहरीमाथि पनि अनुसन्धान भइरहेको छ। १६ वर्षीय आरोपित किशोरले घटनाबारे दिएको बयानको भिडियो सार्वजनिक भएपछि प्रहरीको संवेदनशीलतामाथि प्रश्न उठेको छ।
