नेपाल बीमा प्राधिकरणले भोटेकोशी नदीको बाढीबाट प्रभावित नागरिकको पुनर्स्थापनाका लागि १० करोड रुपैयाँ प्रधानमन्त्री दैवी प्रकोप उद्धार कोषमा जम्मा गरेको छ। प्राधिकरणले मंगलबार उक्त रकम कोषमा दाखिला गरेको हो। भदौ १० गतेको बाढीले प्रभावित भएकाहरुको राहत र पुनस्र्थापनाका लागि यो सहयोग गरिएको हो।
यसैबीच, मधेस प्रदेश सरकारले बाढीपीडितका लागि दोस्रो चरणको राहत सामग्री पठाउने निर्णय गरेको छ। मुख्यमन्त्री कृष्णप्रसाद यादवको अध्यक्षतामा बसेको प्रदेश विपद् व्यवस्थापन कार्यकारी समितिको बैठकले आज राहत सामग्री पठाउने निर्णय गरेको हो। गृह, सञ्चार तथा कानुनमन्त्री फकिरा महतोका अनुसार, आज सात हजार थान कम्बल र ७०० अस्थायी आवासका लागि टेन्ट पठाइनेछ। यसअघि पहिलो चरणमा प्रदेश सरकारले ५५ लाख रुपैयाँ पठाइसकेको थियो।
झापा गाउँपालिकाले पनि बाढीपीडितको राहत, उद्धार तथा पुनःस्थापनाका लागि प्रधानमन्त्री दैवी प्रकोप उद्धार कोषमा रु २५ लाख २८ हजार २८८ सहयोग गर्ने निर्णय गरेको छ। गाउँपालिकाकी कार्यवाहक अध्यक्ष अन्जुदेवी थपलियाका अनुसार, यो रकम जनप्रतिनिधि, कर्मचारी र शिक्षकबाट सङ्कलन गरिनेछ।
