वीरगञ्ज । हवाई इन्धन चोरीको आरोपमा पक्राउ परेका ७ जनामध्ये ६ जनालाई पर्सा जिल्ला अदालतले धरौटीमा रिहा गर्न आदेश दिएको छ। भदौ २१ गते पक्राउ परेका उनीहरूलाई मंगलबार अदालतको आदेशमा धरौटीमा छाडिएको हो।
अदालतले उमेश राना मगर र मन्द सिंह लामासँग जनही ४५ हजार रुपैयाँ धरौटी मागेको छ। त्यस्तै, असलम हवारी, रफिक मियाँ, सन्देश राना मगर र केशर राना सुनारसँग जनही २५ हजार रुपैयाँ धरौटी माग गरिएको छ।
यद्यपि, घटनाको मुख्य आरोपी पेट्रोल पम्पका सञ्चालक सुनैन मियाँ भने अदालतमा उपस्थित भएका छैनन्। उनको थुनछेक बहस हुन बाँकी रहेको अदालत स्रोतले जनाएको छ।
यसअघि भदौ २ गते अदालतले मियाँ बिरामी रहेको भन्दै ५ दिनको म्यादमा अनुसन्धान सकेर फाइल बुझाउन वा बाहिर बसेर अनुसन्धान गर्न आदेश दिएको थियो। प्रहरीले अनुसन्धान सकेर मुद्दा बुझाए पनि मियाँ अदालतमा हाजिर भएका थिएनन्।
