भोटेकोशी नदीमा आएको विनाशकारी बाढीले सीमा स्तम्भ बगाएको नेपाल-चीन सीमा क्षेत्रमा नेपाली सेना र सशस्त्र प्रहरी बल, नेपालको संयुक्त प्रयासपछि राष्ट्रिय झण्डा पुनः फहराइएको छ।
प्रधानमन्त्री कार्यालयका अनुसार बाढीले सीमावर्ती क्षेत्रका भौतिक संरचना र सीमा स्तम्भहरू बगाएको थियो। नदीको निरन्तर कटानले नेपालतर्फको सीमा यकिन गरी झण्डा गाड्न चुनौतीपूर्ण बनेको थियो।
भौगोलिक कठिनाइ र नदीको कटानका बाबजुद दुवै सुरक्षा निकायको समन्वयमा सीमा क्षेत्र पहिचान गरी राष्ट्रिय झण्डा ठड्याइएको प्रधानमन्त्री कार्यालयले जनाएको छ।
रसुवाका अनुसार, बाढीले सीमा क्षेत्रका भौतिक संरचना र सीमा स्तम्भहरू बगाएपछि झण्डा पुनर्स्थापना गरिएको हो। भोटेकोशीको बहाव र कटान जारी रहेकाले सीमा पहिचान गरी झण्डा गाड्न सुरक्षाकर्मीलाई कठिनाइ भएको थियो।
बाढीले भौगोलिक स्वरूप परिवर्तन गरेको र जमिन भासिने जोखिम रहे पनि राष्ट्रियताको प्रतीक झण्डालाई उच्च प्राथमिकता दिँदै सुरक्षाकर्मीले जोखिमपूर्ण कार्य सम्पन्न गरेका हुन्। सीमा स्तम्भ बगाउँदा सीमा पहिचानमा अन्योल सिर्जना भए पनि सुरक्षा निकायको समन्वयमा सही स्थान पहिचान गरी झण्डा राखिएको छ।
बाढीले सीमा क्षेत्रको सडक र अन्य संरचनामा समेत क्षति पुर्याएको छ। सुरक्षाकर्मीहरू सीमा सुरक्षाका साथै क्षतिको विवरण संकलन गरिरहेका छन्।
