भोटेकोशी–त्रिशूली बाढीबाट विस्थापित नागरिकका लागि अस्थायी आवासको व्यवस्था गर्न सरकारले सर्वेक्षण थालेको छ। शहरी विकास तथा भवन निर्माण विभागका उपमहानिर्देशक प्रकाश अर्यालले स्थानीय तहमार्फत परिवारको वास्तविक आवश्यकता पहिचान गरिने बताए। सर्वेक्षणबाट आवास आवश्यक पर्ने परिवारको संख्या यकिन गरी सुरक्षित स्थान छनोट गरेर निर्माण अघि बढाइनेछ।
सर्वेक्षणमा घरको क्षति, जग्गाको अवस्था, अस्थायी आवास वा भाडामा बस्ने इच्छा, खानेपानी र सरसफाइ जस्ता विवरण संकलन गरिनेछ। एक साताभित्र सर्वेक्षण सक्ने लक्ष्य छ।
सरकारका अनुसार हाल ३७ होल्डिङ सेन्टरमा ३,६२८ जना आश्रय लिइरहेका छन्। बाढीले ७,५७० निजी भवन पूर्ण वा आंशिक रूपमा क्षतिग्रस्त बनाएको छ। ३२,९३३ जना नागरिक प्रभावित भएका छन्।
दीर्घकालीन पुनर्स्थापनाका लागि सुरक्षित जग्गा पहिचान गर्न सरकारले छुट्टै समिति गठन गरिसकेको छ। यस समितिले बाढीले घरजग्गामा क्षति भई विस्थापित भएका परिवारको यथार्थ विवरण पहिचान गर्नेछ।
