धादिङको कृष्णभीरमा बाढीले भासिएको पृथ्वी राजमार्गमा एकतर्फी सवारी सञ्चालनको परीक्षण सुरु भएको छ। करिब दुई सातादेखि रोकिएका ग्यास बुलेट र ट्रकलाई विकल्पमा बनेको नयाँ ट्र्याकबाट पठाइएको छ।
त्रिशूली नदीमा आएको बाढीले सडक कटान गरी भासिएपछि राजमार्ग अवरुद्ध भएको थियो। २५२ मिटर लामो नयाँ ट्र्याकबाट सवारी पठाउने काम सुरु गरिएको हो। Nmkhabarलाई स्रोतले पुष्टि गर्यो।
पूर्वाधार विकास मन्त्रालयका अनुसार काठमाडौं–चितवनतर्फबाट एक बुलेटसहित करिब २० वटा सवारीसाधन र चितवन–काठमाडौं तर्फबाट एक भारी सवारीसाधन परीक्षणका रूपमा पास गराइएको छ।
सडकको सतहलाई अन्तिम रूप दिने, दुई लेन सञ्चालनयोग्य बनाउने, ग्राभेल बिछ्याउने र नाली निर्माणको काम तीव्र छ।
निर्माण सकेर बिहीबारदेखि कृष्णभीर खण्डमा दुईतर्फी सवारी सञ्चालन गर्ने तयारी छ। भदौ १४ गतेको बाढीले धादिङको कृष्णभीरसँगै मकवानपुरको परेवाभीर र नागढुंगा नजिकैको पातले वन क्षेत्रमा पनि सडक भासिएको थियो।
