काठमाडौँ । नेपाल आयल निगमले १० दिनमा करिब ४ लाख सिलिन्डर ग्यास वितरण गरेको दाबी गरेको छ। तर, उपभोक्ताहरूले ग्यास नपाएको गुनासो गरेका छन्।
निगमका सहप्रवक्ता शिशिर सुवेदीका अनुसार भदौ १८ देखि २७ गतेसम्म वैकल्पिक मार्ग हुँदै ३ लाख ९९ हजार ५२९ सिलिन्डर वितरण गरियो। यस अवधिमा दैनिक औसत ४० हजार सिलिन्डर ग्यास उपत्यकामा बिक्री भएको उनले जानकारी दिए।
पृथ्वी राजमार्गको कृष्णभीरमा पहिरो खसेपछि मुख्य सडक अवरुद्ध छ। वैकल्पिक मार्गबाट तराईका उद्योगमा ग्यास रिफिल गरी उपत्यका र आसपासका जिल्लामा वितरण भइरहेको छ। निगमले ग्यास लुकाउने वा कृत्रिम अभाव सिर्जना गर्नेविरुद्ध कारबाही तीव्र पारेको छ। अनुगमनमा लुकाइएका करिब एक हजार २०० सिलिन्डर वितरण गरिए। अनियमितता गर्ने विक्रेतालाई जरिवाना गरिएको निगमले जनाएको छ।
निगमले ग्यास आयात र वितरण बढेको दाबी गरे पनि उपभोक्ताले ग्यास नपाएको गुनासो गरेका छन्। ग्यास डिपोहरूमा लामो लाइन देखिन्छन्। कतिपयले एक हप्तादेखि लाइन बसे पनि ग्यास पाएनन्।
