मनास्लु हिमालको तेस्रो शिविरमा हिमपहिरोले टेन्ट पुरिँदा दुई आरोहीको मृत्यु भएको छ। भारतीय मूलका जर्मनीका नागरिक ध्रुवज्योति गुहा र उनका आरोहण सहयोगी फुर्सेम्बा शेर्पाको सुतिरहेको अवस्थामा ज्यान गएको जिल्ला प्रहरी कार्यालयले जनाएको छ।
मकालु एड्भेञ्चर कम्पनी प्रालिमार्फत मनास्लु आरोहणका लागि गएका गुहा र शेर्पा तेस्रो शिविरमा करिब सात फिट हिउँले पुरिएका थिए। उनीहरूको शव हेलिकप्टरमार्फत काठमाडौं लैजाने तयारी भइरहेको छ।
यस घटनासँगै यस आरोहण याममा मनास्लुमा मृत्यु हुनेको संख्या चार पुगेको छ। यसअघि सिङ्गापुरका आरोही लाउ वी सेङ र नेपाली सहयोगी टासी शेर्पाको पनि यस याममा मनास्लु आरोहणकै क्रममा मृत्यु भएको थियो।
यस याममा ४८० विदेशी आरोहीले मनास्लु आरोहणका लागि अनुमति लिएका छन्। आरोहणका लागि आवश्यक रोप फिक्सिङको काम सकिएको छ। आरोहीहरू अन्तिम तयारीमा जुटेका छन्।
