प्रस्तावित प्रधानन्यायाधीश डा. मनोज शर्माविरुद्ध संसदीय सुनुवाइ समितिमा ७ वटा उजुरी परेका छन्।
समितिले वैशाख २६ गते डा. शर्मालाई प्रधानन्यायाधीशमा नियुक्त गर्न अनुपयुक्त ठान्ने जोकोहीलाई आह्वान गरेको थियो। स्पष्ट आधार र सबुत प्रमाणसहित उजुरी दिन भनिएको थियो। त्यसका लागि १० दिनको समय तोकिएको थियो।
सङ्घीय संसद् सचिवालयका प्रवक्ता सहसचिव एकराम गिरीले शनिबार साँझसम्म ७ उजुरी परेको जानकारी दिएका छन्। उजुरी दिने म्याद सोमबार कार्यालय समयसम्म रहेको छ।
उजुरी दिनेले आफ्नो नाम, थर, वतन र फोन नम्बर स्पष्ट खुलाउनुपर्ने प्रावधान राखिएको थियो।
समितिले प्राप्त उजुरीमाथि छलफल र छानबिन गरेपछि प्रस्तावित प्रधानन्यायाधीश शर्मासँग प्रत्यक्ष सुनुवाइ गर्नेछ।
