सर्लाही कारागार क्षमताभन्दा बढी कैदीबन्दीले भरिएको पाइएको छ। मधेशका गृहमन्त्री फकिरा महतोले सोमबार यसको अनुगमन गरे। मन्त्री महतोले कारागारको सुरक्षा, स्वास्थ्य, खानेपानी, सरसफाइ र मौलिक सुविधाबारे जानकारी लिए। उनको सचिवालयले अदालतको सेवा प्रवाह, प्रशासनिक अवस्था र भौतिक पूर्वाधारको पनि अनुगमन भएको जनायो।
कारागार प्रशासनले क्षमताभन्दा बढी कैदीबन्दी राख्नुपरेको मन्त्रीलाई अवगत गरायो। पर्याप्त भौतिक संरचना अभाव र व्यवस्थापनमा समस्या रहेको पनि बताइयो। अदालत प्रशासनले पनि सेवा प्रवाहलाई थप प्रभावकारी बनाउन स्रोतसाधनको अभाव रहेको उल्लेख गरेको थियो।
मन्त्री महतोले न्यायिक सेवा नागरिकमैत्री र प्रभावकारी हुनुपर्नेमा जोड दिए। अदालत तथा कारागार सुधार प्रदेश सरकारको प्राथमिकतामा रहेको उनले बताए। उनले आवश्यक समन्वय र स्रोत व्यवस्थापनका लागि प्रदेश सरकारबाट सक्दो सहयोग गर्ने प्रतिबद्धता जनाए। कैदीबन्दीप्रति कानुनअनुसार मानवीय व्यवहार गर्नुपर्ने उनको भनाइ थियो। मन्त्री महतोले आवश्यक सेवा सहज रूपमा उपलब्ध गराउन सम्बन्धित निकायलाई निर्देशन दिए।
