ताजा अपडेट: परराष्ट्रमन्त्री खनाल र अस्ट्रेलियाली विदेशमन्त्री वोङबीच मेलबर्नमा वार्ता, थप सहायता
अस्ट्रेलियाले बाढी तथा विपद्बाट प्रभावित नेपालका लागि थप १५ मिलियन अस्ट्रेलियन डलर सहयोग घोषणा गरेको छ। यो सहयोग यसअघि अस्ट्रेलियाले उपलब्ध गराएको ११ मिलियन अस्ट्रेलियन डलरमा थप हुनेछ।
मेलबर्नमा बिहीबार परराष्ट्रमन्त्री शिशिर खनाल र अस्ट्रेलियाकी विदेशमन्त्री सिनेटर पेनी वङबीचको भेटवार्ताका क्रममा उक्त सहयोग घोषणा भएको हो। विदेशमन्त्री वङले बाढीबाट प्रभावित नेपाली परिवार तथा समुदायप्रति सहानुभूति व्यक्त गर्दै पुनर्निर्माण, अत्यावश्यक सेवा पुनःस्थापना र भविष्यका विपद्को जोखिम घटाउन पूर्वसूचना प्रणाली सुदृढ गर्न यो सहयोग उपयोग गरिने बताइन्।
मन्त्री खनालले अस्ट्रेलिया सरकार र जनताबाट प्राप्त मानवीय सहयोगप्रति आभार व्यक्त गरेका छन्। उनले जलवायु परिवर्तनका कारण हिमाली क्षेत्रमा बढ्दो जोखिमलाई अन्तर्राष्ट्रिय तहमा उठाउन अस्ट्रेलियाको सहयोग आवश्यक रहेकोमा जोड दिए।
भेटवार्तामा नेपाल–अस्ट्रेलिया सम्बन्ध, विपद्पछिको पुनर्निर्माण, जलवायु परिवर्तन, शिक्षा, आर्थिक सहकार्य तथा हवाई सम्पर्कलगायत विषयमा छलफल भएको थियो। नेपालले जलवायु अनुकूलन, पूर्वसूचना प्रणाली, विपद् जोखिम न्यूनीकरण र जलवायु–उत्थानशील पूर्वाधारमा सहकार्य विस्तार गर्न आग्रह गरेको छ।
नेपालमा अस्ट्रेलियाबाट मान्यताप्राप्त प्राविधिक तथा व्यावसायिक शिक्षा एवं तालिम संस्था र सम्भावित विश्वविद्यालय स्याटेलाइट क्याम्पस स्थापना, नेपाली विद्यार्थीका लागि विद्यार्थी भिसा नीतिमा न्यायोचित व्यवस्था तथा व्यापार, लगानी, प्रविधि, नवीकरणीय ऊर्जा, पर्यटन र श्रम गतिशीलतामा सहकार्य बढाउने विषयमा समेत कुराकानी भएको थियो। दुई देशबीच सिधा हवाई सम्पर्क स्थापना गर्ने सम्भावनाबारे पनि छलफल भएको छ।
अस्ट्रेलियाको परराष्ट्र मन्त्रालयका अनुसार अस्ट्रेलियामा नेपाली मूलका २ लाखभन्दा बढी मानिस बसोबास गर्छन्। दुवै पक्षले नेपाल–अस्ट्रेलिया सम्बन्धलाई थप बहुआयामिक बनाउँदै विपद् पुनर्निर्माण, जलवायु, शिक्षा र आर्थिक सहकार्यका क्षेत्रमा निरन्तर सहकार्य गर्ने प्रतिबद्धता व्यक्त गरेका छन्।
