महोत्तरीको बर्दिबास नगर क्षेत्रका सबै सामुदायिक, संस्थागत र धार्मिक विद्यालयहरू बिहीबार (२१ जेठ) र शुक्रबार (२२ जेठ) दुई दिन बन्द गरिएका छन्। अत्यधिक गर्मीले बालबालिकाको स्वास्थ्यमा जोखिम बढेपछि नगर कार्यपालिकाको कार्यालयले यो निर्णय गरेको हो।
नगरका प्रमुख प्रशासकीय अधिकृत राममणि अधिकारीका अनुसार, जिल्लामा गत शनिबारयता तापक्रम निरन्तर ३८ डिग्री सेल्सियसको हाराहारीमा छ। यो प्रचण्ड गर्मीले जनजीवन प्रभावित बनाएको छ।
गत आइतबार गौशाला–१२ स्थित राष्ट्रिय माध्यमिक विद्यालयमा कक्षाकोठामै १० जना छात्रा बेहोस भएर ढलेका थिए। उपचारपछि उनीहरूको स्वास्थ्य सामान्य भइसकेको छ।
मटिहानी नगरप्रमुख हरिप्रसाद मण्डलले मौसममा सुधार नआए अन्य स्थानीय तहले पनि विद्यालय बन्द गर्ने विषयमा छलफल गर्ने बताए। हालसम्म बर्दिबासबाहेक अन्य स्थानीय तहले विद्यालय बन्द गर्ने सूचना जारी गरेका छैनन्।
गर्मीका कारण हाटबजार र कार्यालयहरूमा समेत चहलपहल घटेको छ। बालबालिका, वृद्धवृद्धा, गर्भवती तथा सुत्केरी महिला र कडा शारीरिक श्रम गर्ने मजदुरहरू गर्मीबाट बढी प्रभावित भएका छन्।
