भेरी करिडोर: रिजीगार र उसुम खोलामा अस्थायी संरचनाबाट सवारी सञ्चालन
भेरी करिडोरअन्तर्गत जाजरकोट–डोल्पा सडकखण्डको रुकुम पश्चिमको आठबीसकोट नगरपालिका–६ मा दुई वटा अस्थायी संरचना निर्माण गरी सवारीसाधन सञ्चालन गरिएको छ। वर्षायाममा खोलामा पानीको बहाव बढेपछि रिजीगार र उसुम खोलामा अस्थायी संरचना बनाएर यातायातका साधन चल्न थालेका हुन्। यसले स्थानीय नागरिकलाई जाजरकोट र डोल्पा आवतजावत गर्न सहज बनाएको छ।
आयोजना प्रमुख नरेशकुमार केसरीका अनुसार रमण निर्माण सेवाले गत जेठ ७ गते करिडोर आयोजनासँग सम्झौता गरी काम सम्पन्न गरेको थियो। खोलामा हुम पाइप प्रयोग गरी अस्थायी संरचना निर्माण गरिएको छ।
यसअघि पुल नहुँदा डोल्पा आवतजावतमा समस्या हुने गरेको थियो। रिजीगार र उसुम खोलाका साथै अन्य ११ ठाउँमा पुल निर्माणका लागि ठेक्का प्रक्रिया अघि बढेको र केही दिनमा सम्झौता हुने आयोजनाले जनाएको छ।
