चालु आर्थिक वर्षमा नेपालको प्रतिव्यक्ति कुल गार्हस्थ्य उत्पादन (जीडीपी) १ हजार ५ सय १३ अमेरिकी डलर पुग्ने अनुमान छ। सरकारले बुधबार सार्वजनिक गरेको आर्थिक सर्वेक्षण प्रतिवेदनले यस्तो देखाएको हो।
सर्वेक्षण अनुसार, यस आर्थिक वर्षमा प्रतिव्यक्ति राष्ट्रिय आय १ हजार ५ सय ३५ डलर र प्रतिव्यक्ति कुल राष्ट्रिय खर्चयोग्य आय २ हजार ४४ डलर पुग्नेछ। यसैगरी, चालु आर्थिक वर्षमा व्यापार घाटा पाँच प्रतिशतले बढेको छ।
आर्थिक सर्वेक्षणले स्थिर लगानी १८ प्रतिशतले वृद्धि हुने, उद्योग दर्ता १२ प्रतिशतले बढ्ने र ९९ प्रतिशत जनसङ्ख्यामा बिजुली पुगेको तथ्याङ्क सार्वजनिक गरेको छ। वैदेशिक रोजगारीका लागि श्रम स्वीकृति लिनेको संख्या ६९ लाख पुगेको छ।
यस्तै, कृषि क्षेत्रको ४४.६ प्रतिशतमा सिँचाइ सुविधा पुगेको छ। विकासोन्मुख मुलुक बन्न नेपाललाई थप ७ खर्ब ५५ अर्ब लगानी आवश्यक पर्ने प्रतिवेदनले औंल्याएको छ।
यसबीच, शेयर बजार परिसूचक (नेप्से) ४.९९ अङ्कले बढेको छ। एनसेलले गुणस्तर र वातावरण व्यवस्थापनका लागि आईएसओ ९००१ र १४००१ मान्यता प्राप्त गरेको छ।
