काठमाडौं महानगरपालिकाले बहालमा लिएका घर, कोठा तथा फ्ल्याट १५ दिनभित्र खाली गर्न ६ वटा सहकारी संस्थालाई निर्देशन दिएको छ। महानगरपालिकाको कानुन तथा मानव अधिकार विभागले बुधबार सूचना जारी गर्दै सहकारीका पदाधिकारी, कर्मचारी र सदस्यहरूलाई १५ दिनभित्र महानगरको सम्पर्कमा आउन आग्रह गरेको हो।
न्यायिक समितिले यसअघि सहकारी संस्थाले भाडामा लिएका कार्यालय खाली गराउनुपर्ने निर्णय गरेको थियो। सोही निर्णय कार्यान्वयन गर्न गत जेठ १३ गतेको निर्णय कार्यान्वयन समितिको बैठकले १५ दिने म्यादसहित सार्वजनिक सूचना जारी गर्ने निर्णय गरेको थियो।
कारबाही सूचीमा वडा नम्बर ३ को सत्कार सहकारी संस्था लिमिटेड, वडा नम्बर १५ को अमृताम्भ बचत तथा ऋण सहकारी संस्था, वडा नम्बर २२ को हिराखुसी बहुउद्देश्यीय सहकारी संस्था लिमिटेड, वडा नम्बर ३२ को मार्गदर्शन बचत तथा ऋण सहकारी संस्था लिमिटेड, नवल सवल बचत तथा ऋण सहकारी संस्था लिमिटेड र पञ्चरूपा बचत तथा ऋण सहकारी संस्था लिमिटेड छन्।
