काठमाडौं विश्वविद्यालयको एक सर्वेक्षणले ७० प्रतिशत नेपाली नागरिक देश गलत दिशातर्फ गइरहेको ठान्ने देखाएको छ।
काठमाडौं विश्वविद्यालयको स्कुल अफ आर्ट्स र इन्टरडिसिप्लिनरी एनालिस्ट्स (आईडीए) ले गरेको ‘नेपाली जनमत सर्वेक्षण–२०२५’ को प्रतिवेदन २०८३ आश्विन २१ गते सार्वजनिक भएको हो।
‘जेनजी’ आन्दोलनअघि देश गलत दिशामा गएको ठान्ने ६१.८ प्रतिशत नागरिक थिए, जुन आन्दोलनपछि बढेर ७० प्रतिशत पुगेको छ। देश सही दिशामा गएको ठान्ने नागरिकको संख्या भने २३.७ प्रतिशतबाट घटेर १७.५ प्रतिशतमा झरेको छ।
नागरिकले देश गलत बाटोमा जानुका प्रमुख कारणहरूमा बढ्दो भ्रष्टाचार (६३.४ प्रतिशत), जीविकोपार्जन तथा रोजगारीको अभाव (५४.५ प्रतिशत), अर्थतन्त्र बिग्रनु (४०.५ प्रतिशत) र महँगी (३२.९ प्रतिशत) लाई औँल्याएका छन्।
सर्वेक्षणमा ६०.२ प्रतिशत उत्तरदाताले ‘जेन जी’ आन्दोलन वा सम्झौताले युवाहरूको वास्तविक भावना बोक्न नसकेको बताएका छन्। ८६.३ प्रतिशतले भ्रष्टाचार नियन्त्रण पहिलो प्राथमिकता हुनुपर्ने माग गरेका छन्।
सन् २०२५ सेप्टेम्बरमा भएको सामाजिक सञ्जाल प्रतिबन्धले आफ्नो जीविकोपार्जन वा पढाइमा असर परेको ४८.५ प्रतिशत नागरिकले जनाएका छन्। ५२ प्रतिशत उत्तरदाताले मुलुकमा शान्ति, स्थायित्व र विधिको शासन कायम राख्न नेपाली सेनाको भूमिका रहेको बताएका छन्।
सर्वेक्षणको विस्तृत प्रतिवेदनका सबै पक्षहरू भने अझै सार्वजनिक भएका छैनन्।
