जापान अन्तर्राष्ट्रिय सहयोग नियोग (जाइका) ले नागढुंगा सुरुङ निर्माण आयोजनाका लागि थप ५.७ अर्ब जापानी येन ऋण स्वीकृत गरेको छ। यस अतिरिक्त ऋणसँगै आयोजनाका लागि कुल ऋण २२ अर्ब जापानी येनभन्दा बढी पुगेको छ।
अर्थ मन्त्रालयका सचिव घनश्याम उपाध्याय र नेपालका लागि जापानका राजदूत माएदा तोरुले अतिरिक्त सहयोगसम्बन्धी एक्सचेन्ज अफ नोट्समा हस्ताक्षर गरे। अर्थ मन्त्रालयका सहसचिव धनीराम शर्मा र जाइका नेपालका प्रमुख प्रतिनिधि मात्सुजाकी मिजुकीले ऋण सम्झौतामा हस्ताक्षर गरे।
नागढुंगा सुरुङ निर्माण आयोजनाले काठमाडौं र देशका अन्य महत्वपूर्ण क्षेत्रबीचको यातायात सञ्जाल सुधार गर्ने लक्ष्य राखेको छ। यो परियोजनाले नागढुंगा आसपासको यातायातलाई सहज बनाउनेछ।
सुरुङको भौतिक प्रगति ९९ प्रतिशत नजिक छ। यसको निर्माण अन्तिम चरणमा छ। यो सुरुङ सन् २०२६ को जुलाईदेखि सर्वसाधारणका लागि खुला हुने अपेक्षा छ। २.६८ किलोमिटर लामो सुरुङले यस क्षेत्रको यात्रालाई महत्वपूर्ण रुपमा परिवर्तन गर्नेछ। यसले भविष्यका पूर्वाधार परियोजनाहरूको लागि आधार तयार गर्नेछ। यसले नेपालको विकासलाई टेवा पुग्नेछ।
यो पहलले सुरुङभन्दा बाहिर पनि आर्थिक सुदृढता र दिगो विकासलाई प्रवर्द्धन गर्न आधुनिक सुरुङ प्रविधिको प्रयोग गर्नेछ। यो पहलले दिगो विकास लक्ष्य ९ (उद्योग, पूर्वाधार र नवप्रवर्तन) लाई समर्थन गर्दछ। यसले नेपालको सडक सञ्जाल सुधार गर्न जापानको निरन्तर प्रतिबद्धतालाई पुनः पुष्टि गर्दछ।
जाइकासँगको सहकार्यले नेपालमा सडक निर्माण र पूर्वाधार विकासमा महत्वपूर्ण प्रगति भएको छ। १६० किलोमिटरको बीपी राजमार्ग–सिन्धुली सडक, ९.१ किलोमिटरको काठमाडौं–भक्तपुर सडक र काठमाडौं उपत्यका तथा ग्रामीण क्षेत्रका धेरै पुलहरू यसका उदाहरण हुन्। यसबाट नागढुंगा सुरुङ पनि नेपालको पूर्वाधार इतिहासमा एक विश्वस्तरीय निर्माण हुने विश्वास गरिएको छ।
