काठमाडौं । चालु आर्थिक वर्ष २०८२/८३ को ११ महिना (साउन–जेठ) सम्ममा नेपालको सार्वजनिक ऋण २९ खर्ब ६१ अर्ब १९ करोड रुपैयाँ पुगेको छ। यस अवधिमा सरकारले विकास निर्माणमा गरेको पूँजीगत खर्च १ खर्ब ३२ अर्ब ६६ करोड रुपैयाँ मात्र रहे पनि ऋणको साँवा भुक्तानीमा २ खर्ब ८४ अर्ब ४५ करोड रुपैयाँ खर्च भएको छ।
महालेखा नियन्त्रक कार्यालयको तथ्यांक अनुसार, यो अवधिमा सरकारले कुल सार्वजनिक ऋण परिचालन ४ खर्ब १८ अर्ब १२ करोड रुपैयाँ गरेको छ। विनिमय दरमा आएको उतारचढावले नेपाली मुद्रा कमजोर हुँदा बाह्य ऋणमा १ खर्ब ५३ अर्ब ४७ करोड रुपैयाँ थप भार परेको छ। यसले गर्दा ११ महिनामा कुल सार्वजनिक ऋणभार ५ खर्ब ७१ अर्ब ५९ करोड थपिएको छ।
गत आर्थिक वर्ष २०८२/८३ को अन्त्यसम्ममा सार्वजनिक ऋण २६ खर्ब ७४ अर्ब ४ करोड रुपैयाँ थियो। जेठ मसान्तसम्म आइपुग्दा आन्तरिक ऋण १३ खर्ब ७७ अर्ब २८ करोड र बाह्य ऋण १५ खर्ब ८३ अर्ब ९१ करोड गरी कुल ऋण २९ खर्ब ६१ अर्ब पुगेको हो। नेपालको सार्वजनिक ऋण कुल गार्हस्थ उत्पादन (जीडीपी)को ४४.८७ प्रतिशत पुगेको छ।
सरकारले चालु आर्थिक वर्षमा सार्वजनिक ऋणबाट ५ खर्ब ९५ अर्ब ६६ करोड रुपैयाँ जुटाउने लक्ष्य लिएकोमा जेठ मसान्तसम्म ४ खर्ब १८ अर्ब १२ करोड (७०.२० प्रतिशत) परिचालन भएको छ। यसमा आन्तरिक ऋण ९३.५५ प्रतिशत परिचालन भएको छ।
अर्थमन्त्री डा. स्वर्णिम वाग्लेले सार्वजनिक गरेको आगामी आर्थिक वर्ष २०८३/८४ को बजेट अनुसार, आन्तरिक ऋणको साँवा भुक्तानीमा मात्र २ खर्ब ४५ अर्ब ८९ करोड खर्च गर्ने लक्ष्य छ। यसले आगामी केही वर्ष विकास खर्च कटौती गरेर ऋण भुक्तानीमै ठूलो रकम खर्च गर्नुपर्ने बाध्यतालाई औंल्याएको छ।
