नेपाली कांग्रेसका पदाधिकारी र केन्द्रीय सदस्यले लिए शपथ, पाँच जनाको रोकियो

नेपाली कांग्रेसका नवनिर्वाचित पदाधिकारी र केन्द्रीय सदस्यहरूले २०८३ कार्तिक १२ गते बिहीबार पार्टी कार्यालय सानेपामा पद तथा गोपनीयताको शपथ लिएका छन्। सभापति गगन थापाले विशेष समारोहमा उनीहरूलाई शपथ ग्रहण गराएका हुन्।

सभापति थापाले भने गत असोज ३१ गते नै पद तथा गोपनीयताको शपथ लिइसकेका थिए। शपथ ग्रहण सम्पन्न भएसँगै नवनिर्वाचित केन्द्रीय सदस्यहरूलाई निर्वाचित भएको प्रमाणपत्र वितरण गरिएको छ।

कांग्रेसले अदालतमा मुद्दा विचाराधीन रहेकाले चार केन्द्रीय सदस्यको शपथ रोकेको छ। शपथ रोकिएका केन्द्रीय सदस्यहरूमा सन्तोष चालिसे, विनिता खड्का, मोहन बस्नेत र उमेशचन्द्र यादव रहेका छन्। केन्द्रीय सदस्यका उम्मेदवार सौगात थापाले सुशील भट्ट ३६ वर्ष पुगेको दाबी गर्दै निर्वाचन आयोगमा उजुरी दिएकाले उनको शपथ पनि रोकिएको छ।

१५औँ महाधिवेशनबाट २३१ सदस्यीय केन्द्रीय समिति निर्वाचित

नेपाली कांग्रेसको १५औँ महाधिवेशन २०८३ असोज १८ देखि २३ गतेसम्म काठमाडौंको खुलामञ्चमा सम्पन्न भएको थियो। यस महाधिवेशनबाट २३१ सदस्यीय केन्द्रीय समिति निर्वाचित भएको छ।

महाधिवेशनबाट वरिष्ठ उपसभापतिमा विश्वप्रकाश शर्मा, खुला उपसभापतिमा डा. चन्द्रकान्त भण्डारी र ई. मधु आचार्य, महिला उपसभापतिमा पुष्पा भुसाल र समावेशी उपसभापतिमा विनोद चौधरी निर्वाचित भएका छन्। महामन्त्रीत्रयमा प्रदीप पौडेल, उदयशमशेर जबरा र डा. डिला संग्रौला (पन्त) निर्वाचित भएका थिए। विभिन्न क्लस्टरबाट ११ जना सहमहामन्त्री पनि निर्वाचित भएका छन्।

नेपाली कांग्रेसको विधानअनुसार २९७ सदस्यीय केन्द्रीय कार्यसमिति रहने व्यवस्था छ, जसमा ६६ जना सदस्य सभापतिले मनोनीत गर्ने प्रावधान छ।

शपथपछि केन्द्रीय कार्यसमितिको पहिलो बैठक

शपथ ग्रहण र पदबहाली सम्पन्न भएसँगै नयाँ केन्द्रीय कार्यसमितिको पहिलो बैठक आजै सानेपामा बस्ने तयारी छ। यो बैठकले महाधिवेशन सम्पन्न गराउन सहयोग गर्ने महाधिवेशन प्रतिनिधि, निर्वाचन समिति, सुरक्षाकर्मी, सञ्चारकर्मी तथा पार्टी पंक्तिलाई धन्यवाद ज्ञापन गर्ने लगायतका विषयमा निर्णय गर्ने बताइएको छ।

बैठकमा पार्टीको जिल्ला तथा प्रदेश अधिवेशनका विषयमा पनि छलफल हुने नेताहरूले जानकारी दिएका छन्। अदालतबाट सफाइ पाएपछि रोकिएका केन्द्रीय सदस्यहरूले जिम्मेवारी पाउने छन्।