नेपाल प्रिमियर लिग (एनपीएल) २०२६ अन्तर्गत आज शुक्रबार साँझ कीर्तिपुरस्थित टीयू अन्तर्राष्ट्रिय क्रिकेट मैदानमा अंकविहीन पोखरा एभेन्जर्स र चितवन राइनोजबीच खेल हुँदैछ। प्रतियोगितामा हालसम्म तीन खेल खेलेको पोखरा एभेन्जर्सले कुनै अंक जोड्न सकेको छैन।
अंक तालिकाको आठौँ स्थानमा रहेको पोखरा एभेन्जर्सका कप्तान कुशल भुर्तेलको टोलीलाई आजको खेलमा पहिलो जित निकाल्नैपर्ने दबाब छ। उता, तीन खेलबाट तीन अंक जोडेको चितवन राइनोज अंक तालिकाको सातौँ स्थानमा छ। चितवन राइनोजका कप्तान कुशल मल्लको टोली पनि आफ्नो स्थान सुधार्ने दाउमा छ।
पोखरा एभेन्जर्सको जितविहीन यात्रा
पोखरा एभेन्जर्सले यस सिजनमा सुदूरपश्चिम रोयल्ससँग ६ विकेटले, जनकपुर बोल्ट्ससँग ९ रनले र लुम्बिनी लायन्ससँग ८ विकेटले हार बेहोरेको छ। चितवन राइनोजले भने विराटनगर किंग्सलाई ८ रनले हराएको थियो। लुम्बिनी लायन्ससँगको खेल नतिजाविहीन टुंगिएको थियो भने सुदूरपश्चिम रोयल्ससँग चितवन ५ विकेटले पराजित भएको थियो।
शुक्रबार साँझ ५ बजे सुरु हुने यस खेलमा दुवै टोलीले आफ्नो प्रदर्शन सुधार्दै अंक तालिकामा माथि उक्लिने लक्ष्य राखेका छन्।
