पूर्वीनाका काँकरभिट्टाबाट आर्थिक वर्ष २०८२/८३ मा रु चार अर्ब ९१ करोड ६६ लाख ६२ हजारको कच्चा जुट आयात भएको छ। यो अघिल्लो आव २०८१/८२ को तुलनामा करिब रु ५७ करोड ५४ लाख अर्थात् १३.२५ प्रतिशतले बढी हो। स्वदेशमा जुटखेती घट्दै गएपछि जुट उद्योगहरू भारत र बङ्गलादेशबाट कच्चा जुट आयात गर्न बाध्य भएका छन्।
मेची भन्सार कार्यालयका प्रमुख भन्सार अधिकृत शिवराम न्यौपानेका अनुसार मूल्यका आधारमा काँकरभिट्टा नाकाबाट हुने आयातमा पेट्रोल र डिजेलपछि कच्चा जुट तेस्रो स्थानमा पर्छ। पछिल्ला वर्षहरूमा यस नाकाबाट जुटको आयात निरन्तर बढ्दो रहेको भन्सारको तथ्याङ्कले देखाउँछ।
सरकारी अभिलेखअनुसार २०४३/४४ सालदेखि मोरङ, सुनसरी र झापामा व्यावसायिक जुटखेती विस्तार भएको थियो। त्यसबेला उत्पादन भएको जुट स्वदेशी उद्योगमा प्रयोग हुनुका साथै भारत र बङ्गलादेशमा समेत निर्यात हुन्थ्यो। अहिले स्वदेशी उत्पादनले उद्योगको माग धान्न नसक्दा आयातमा निर्भरता बढेको छ।
कृषि क्षेत्रका अधिकारीहरूका अनुसार जुटखेती घट्नुको मुख्य कारण उत्पादन लागत बढ्नु र किसानले उचित मूल्य नपाउनु हो। उत्पादन खर्च बढे पनि आम्दानी अपेक्षाअनुसार नहुँदा किसानहरू जुटखेती छाडेर धानजस्ता अन्य बालीतर्फ आकर्षित भएका छन्।
कृषि ज्ञान केन्द्र झापाका प्रमुख सागर विष्टका अनुसार झापामा हाल जुटखेती खुम्चिएर करिब पाँच हजार हेक्टर क्षेत्रफलमा मात्र सीमित भएको छ। ‘लागत बढी र आम्दानी कम भएकाले किसानले जुटखेती छाड्दै गएका छन्। केही वर्षयता जुटको उत्पादनमा नराम्ररी गिरावट आएको छ’, उनले भने।
