जेठ १६ गतेदेखि निजी स्वास्थ्य संस्थामा स्वास्थ्य बीमाको आकस्मिकबाहेकका सबै सेवा स्थगित हुने भएका छन्। स्वास्थ्य बीमा बोर्डले बढ्दो वित्तीय सङ्कटलाई कारण देखाउँदै यो निर्णय गरेको हो।
बोर्डको जेठ ११ गतेको बैठकले गरेको यो निर्णय अर्को सूचना जारी नभएसम्म लागू हुने निमित्त कार्यकारी निर्देशक शकुन्तला प्रजापतिले बताइन्। बोर्डले निजी अस्पतालहरूलाई पठाएको पत्रमा वित्तीय सङ्कट र दायित्व बढेको उल्लेख छ।
यस निर्णयले देशभरका निजी अस्पताल, मेडिकल कलेज र नर्सिङ होममा बीमा कार्डबाट हुने ओपीडी तथा नियमित उपचार सेवा बन्द हुनेछन्। आकस्मिक सेवा भने बीमा अन्तर्गत निजी अस्पतालमा सुचारु रहनेछन्।
स्वास्थ्य बीमा बोर्डले ‘सुविधा थैली’ को दररेटमा पनि परिवर्तन गरेको छ। जेठ १६ देखि लागू हुने यो दररेट औषधि, स्वास्थ्य सेवा, शल्यक्रिया र प्रयोगशाला परीक्षणमा लागू हुनेछ। विगत १० वर्षको तथ्याङ्क, दररेट, लागत र वित्तीय दिगोपनलाई आधार बनाएर यो परिवर्तन गरिएको हो।
नयाँ दररेट अनुसार अब एक हजार १७० प्रकारका औषधि मात्र बोर्डबाट उपलब्ध हुनेछन्। यसअघि एक हजार २८९ प्रकारका औषधि पाइन्थ्यो। आमा सुरक्षा जस्ता दोहोरिएका कार्यक्रम हटाइएका छन्।
निजी अस्पतालमा सेवा बन्द भएपछि सरकारी अस्पतालमा बिरामीको चाप बढ्ने निश्चित छ।
