झापाको दमक नगरपालिका-१०, सेतुमाडीस्थित रतुवाखोलामा सेतो प्लास्टिकको बोराभित्र एक युवतीको शव भेटिएको छ। रतुवाखोलाको पुलमुनि बोरामा शव फेला परेको जिल्ला प्रहरी कार्यालय, झापाले जनाएको छ।
प्रहरीका अनुसार, अन्दाजी ३० देखि ३२ वर्ष उमेरकी युवतीको शव फेला परेको हो। मृतकले रातो भेस्ट र जिन्सको पेन्ट लगाएकी थिइन्। शव दुई–तीन दिनदेखि पानीमा रहँदा कुहिएको अवस्थामा भेटिएको जिल्ला प्रहरी कार्यालय, झापाका प्रहरी नायव उपरीक्षक (डीएसपी) खगेन्द्रबहादुर खड्काले जानकारी दिए।
हालसम्म मृतकको पहिचान खुल्न नसकेको र घटनाको अनुसन्धानका लागि इलाका प्रहरी कार्यालय, दमकका डीएसपीको नेतृत्वमा प्रहरी टोली खटिएको डीएसपी खड्काले बताए।
मृतकको बायाँ हातमा ट्याटुसमेत रहेको पाइएको छ। प्रहरीले शवको पहिचान गरिदिन सर्वसाधारणलाई अनुरोध गरेको छ। कसैले मृतकलाई चिनेमा प्रहरीलाई सम्पर्क गर्न आग्रह गरिएको छ।
