उत्तर दक्षिण कोशी राजमार्गको खाँदबारी-नुम सडकखण्डमा ७५ प्रतिशत भौतिक प्रगति भएको छ। सदरमुकाम खाँदबारीबाट नुमसम्मको ३९ किलोमिटर सडक निर्माणले गति लिएको हो।
आयोजना प्रमुख रामबहादुर गुरुङका अनुसार सडकको ८०.७१ प्रतिशत वित्तीय प्रगति भएको छ। हालसम्म रु १ अर्ब २५ करोड ८० लाख पाँच हजार खर्च भइसकेको छ।
पहिलो चरणको १४ किमी सडक कालोपत्रका लागि ९७ प्रतिशत भौतिक प्रगति भएको छ। दोस्रो चरणको १२ किमी सडकको ८४ प्रतिशत काम सम्पन्न भएको छ। तेस्रो चरणमा ६२ प्रतिशत भौतिक प्रगति भएको निर्माण कम्पनी शर्मा/शिवशक्ति जेभिका प्रमुख इन्जिनियर वैभव पाण्डेले बताए। तीनवटै चरणको ठेक्का रु १ अर्ब ५५ करोड ८६ लाख ७७ हजार ९७५ मा लिइएको थियो।
जेभिले २०७८ असार १७ गते सम्झौता गरी २०८० पुस १७ मा काम सक्ने लक्ष्य राखेको थियो। सन्तोषजनक प्रगति नभएपछि पहिलो पटक म्याद थपियो। पुनः म्याद थप गर्दा पनि काम नभएपछि आयोजना कार्यालयले स्पष्टीकरण सोधी धरौटी जफत गरेको थियो। कम्पनीले हालसम्म तीन पटक म्याद थपिसकेको छ।
मोरङको जोगवनीदेखि चीनको सीमा किमाथाङ्का जोड्ने ३५७ किलोमिटर सडकको ट्र्याक खोल्ने काम पनि सम्पन्न भएको छ।
भोटखोला गाउँपालिकाका अध्यक्ष वाङछेदर भोटेले किमाथाङ्का क्षेत्रमा सडक पुगेपछि पर्यटन, व्यापार र सीमावर्ती क्षेत्रको विकासमा नयाँ सम्भावना देखिएको बताए। दशकौँदेखि दुर्गम रहेको किमाथाङ्का राष्ट्रिय सडक सञ्जालमा जोडिएसँगै विकासले गति लिने उनको विश्वास छ।
कोशी प्रदेशको आर्थिक समृद्धिका लागि यो सडक महत्वपूर्ण मानिएको छ। अध्यक्ष भोटेका अनुसार खाँदबारीबाट वरुण नदीभन्दा माथिल्लो क्षेत्र अझै जोखिमपूर्ण छ। नेपाली सेनाले च्याम्ताङबाट घोङ्घोप्पासम्मको चुनौतीपूर्ण खण्डमा सडक निर्माण गरेको थियो।
सेनाले गत वैशाख २८ गते १०.८१ किमी आयोजना कार्यालयलाई हस्तान्तरण गरेको छ। सडक हस्तान्तरण भएसँगै जेठ १ गते पहिलो पटक खाद्यान्न बोकेका तीन ट्याक्टर किमाथाङ्का नाकामा पुगेका थिए।
