नवलपरासी (पश्चिम) सुस्ता गाउँपालिका–५ मा भारतीय सशस्त्र सीमा बल (एसएसबी) का ६ जना सुरक्षाकर्मी हतियारसहित नेपाली भूमिमा प्रवेश गरे। खोला तरेर नेपाली भूमितर्फ आएका एसएसबीका सुरक्षाकर्मीलाई स्थानीयले रोक्दै प्रश्न सोधेपछि उनीहरू फर्किए।
सामाजिक सञ्जालमा भाइरल भिडियोमा स्थानीयले ‘सीमा पार गरेर किन आएको, यो बिहार हो?’ जस्ता प्रश्न सोधेको सुनिन्छ। एक स्थानीयले ‘गोली चलाउँछौ?’ भनेर सोधेको समेत सुनिन्छ। केहीबेरको विवादपछि भारतीय सुरक्षाकर्मीहरू नेपाली भूमिबाट फर्किए।
स्थानीय प्रशासनले भारततर्फको कल्भर्ट भत्किएको र नियमित गस्तीका क्रममा वैकल्पिक बाटोका रूपमा नेपाली भूमिमा आएको जनाएको छ। सुस्ता क्षेत्रलाई लिएर नेपाल र भारतबीच सीमासम्बन्धी विवाद पटक–पटक हुँदै आएको छ। जेठ १९ गते तटबन्ध निर्माणका क्रममा पनि दुई पक्षबीच विवाद चर्किएको थियो।
प्रतिनिधिसभा बैठकमा यो विषयले प्रवेश पायो। श्रम संस्कृति पार्टीका सांसद हर्क साम्पाङले भारतीय सेनाले नेपालीलाई धम्क्याएको विषयमा सरकारको ध्यानाकर्षण गराउँदै रक्षामन्त्रीलाई बोलाउन माग गरे।
प्रमुख प्रतिपक्षी दल नेकपा एमालेले यस घटनाको जिम्मेवार प्रधानमन्त्री बालेन्द्र शाहको अभिव्यक्तिलाई मानेको छ। एमाले प्रमुख सचेतक ऐनबहादुर महरले प्रधानमन्त्रीले ‘नेपालले पनि भारतीय भूमि मिचेको’ अभिव्यक्ति दिएकै कारण सीमा क्षेत्रमा समस्या बढेको दाबी गरे। महरले सुस्ताबासीको प्रतिकारलाई राष्ट्रवादी कदम भन्दै प्रशंसा गरे।
टेकपनाका अनुसार सुस्तामा भारतीय सुरक्षाकर्मी लखेटिएको घटना सत्य भए पनि सामाजिक सञ्जालमा भाइरल भएका केही तस्बिर भने एआई (आर्टिफिसियल इन्टेलिजेन्स) बाट सिर्जित भएको पाइएको छ।
