वैशाख १ देखि १९ गतेसम्मको १९ दिनमा विपद्जन्य घटनाले १२७ जनाको ज्यान लियो, ७७३ जना घाइते भए। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार यो अवधिमा कुल २,७२१ घटना दर्ता भएका छन्।
प्राधिकरणकी प्रवक्ता शान्ति महतका अनुसार विपद्ले ३,७२२ परिवार प्रभावित बने। सर्पदंशका ३९८ घटनामा २३ जनाको मृत्यु भयो, ३७५ जना घाइते भए।
लेक लागेका ५४ घटनामा २१ जनाले ज्यान गुमाए, ३४ जना घाइते भए। चट्याङका २०५ घटनामा १९ जनाको मृत्यु भयो, ९८ जना घाइते बने।
आगलागीका ८३० घटनामा १७ जनाको मृत्यु भयो, १०० जना घाइते भए। जनावरको आक्रमणका १४७ घटनामा १४ जनाले ज्यान गुमाए, ८२ जना घाइते बने। हावाहुरीका ४७४ घटनामा १३ जनाको मृत्यु भयो, ६७ जना घाइते भए।
बाढी, पहिरो, भारी वर्षा, डुङ्गा पल्टिने, वन डढेलो र हिउँ पहिरोले पनि मानवीय क्षति गरायो, प्राधिकरणले जनायो।
पछिल्लो २४ घण्टामा मात्र २७ जिल्लामा ३१ विपद्का घटना भए। ती घटनामा एक जनाको मृत्यु भयो, १५ जना घाइते भए, प्रवक्ता महतले बताइन्।
