रौतहटको मौलापुर नगरपालिकाकी मेयर रिना साहले संघीय सरकारले प्रमुख प्रशासकीय अधिकृत नपठाएर नगरपालिकाको बजेट कार्यान्वयनमा बाधा पुर्याएको आरोप लगाएकी छन्। उनले बजेट फ्रिज गराउने नियतले यस्तो गरिएको दाबी गरेकी छन्।
शुक्रबार सञ्चारकर्मीसँग बोल्दै मेयर साहले बजेट कार्यान्वयन र भुक्तानीको महत्वपूर्ण समयमा नगरपालिकालाई प्रमुख प्रशासकीय अधिकृतविहीन बनाइएको बताइन्। यसले स्थानीय तहलाई गतिरोधमा धकेल्ने र बजेट फ्रिज हुने अवस्था आउने उनको भनाइ छ।
संघीय मामिला तथा सामान्य प्रशासन मन्त्रालयले यसअघि सुरेशबाबु घिमिरेलाई प्रमुख प्रशासकीय अधिकृतका रूपमा मौलापुर पठाएको थियो। तर, उनको जिम्मेवारी प्रभावकारी नभएपछि फिर्ता बोलाइएको र अहिलेसम्म नयाँ अधिकृत नपठाइएको मेयर साहले बताइन्।
मेयर साहले ‘फ्रि बिजुली’, ‘फ्रि पानी’ र ‘छोरीसँग मेयर’ जस्ता जनमुखी कार्यक्रमहरू पनि संघीय सरकारको हस्तक्षेपले प्रभावित पार्ने प्रयास भएको आरोप लगाइन्।
प्रमुख प्रशासकीय अधिकृतको अभावले कृषक अनुदान, बहुपोषण कार्यक्रम, शिक्षा, स्वास्थ्य, सरसफाइ र विकास निर्माणका कामहरू समेत प्रभावित हुने अवस्था सिर्जना भएको उनले चिन्ता व्यक्त गरिन्।
