पर्साको वीरगञ्ज र छिपहरमाईबाट प्रहरीले हेरोइन र गाँजासहित दुई जनालाई पक्राउ गरेको छ।
जिल्ला प्रहरी कार्यालय पर्साका अनुसार, वीरगञ्ज-१६ रजतजयन्ती चोकबाट २८ वर्षीय आदेश ठाकुर खैरो हेरोइनजस्तो पदार्थसहित पक्राउ परे। उनी बारा कलैया उपमहानगरपालिका-६ का हुन्।
शुक्रबार साँझ प्रहरी चौकी इनर्वाबाट खटिएको टोलीले उनको साथबाट ५५० मिलिग्राम लागूऔषध बरामद गरेको थियो।
छिपहरमाई गाउँपालिका-५ मा गरिएको अर्को कारबाहीमा ३६ वर्षीय राजु निषाद पक्राउ परे। उनी भारतको उत्तर प्रदेश, उन्नाव जिल्ला, सफीपुर थाना अन्तर्गत परियरका हुन्।
प्रहरी चौकी भिस्वासहितको टोलीले निषादबाट करिब २ किलोग्राम गाँजा बरामद गरेको प्रहरीले जनायो।
दुवै घटनाका सम्बन्धमा आवश्यक अनुसन्धान भइरहेको प्रहरीले जानकारी दिएको छ।
