लागुऔषध कारोबारी राज सोनीलाई प्रहरीले गोली हानेर घाइते बनाएको छ। आइतबार टेकुमा भएको कारबाहीमा भारतीय नागरिक सोनीको दायाँ खुट्टामा दुई राउन्ड गोली लागेको हो।
घाइते सोनीको राष्ट्रिय ट्रमा सेन्टरमा उपचार भइरहेको छ। प्रहरीले सोनीका सहयोगी बाँकेका निखिल सोनी र सुर्खेतकी शोफिया मगरलाई पनि नियन्त्रणमा लिएको छ।
प्रहरीका अनुसार सोनी काठमाडौं उपत्यकामा लागूऔषध भित्र्याउने मुख्य कारोबारी हुन्। उनीहरूको साथबाट २४ हजार ७ सय क्याप्सुल टेपेन्टाडोल बरामद भएको छ।
टेकुको दोभान पुल नजिक उनीहरूले प्रहरीमाथि आक्रमण गरी भाग्न खोजेका थिए। प्रहरीले आत्मसमर्पणको चेतावनीपछि नियन्त्रणका लागि गोली चलाएको जनाएको छ।
लागुऔषध नियन्त्रण ब्यूरोका प्रमुख एसएसपी सुवास बोहराले घटनाबारे थप अनुसन्धान भइरहेको बताएका छन्।
