प्रमुख निर्वाचन आयुक्त र निर्वाचन आयुक्त पदका प्रस्तावित व्यक्तिविरुद्ध परेका उजुरीमाथि संसदीय सुनुवाइ समितिले आज छलफल गर्दैछ। बिहान ११ बजे सिंहदरबारस्थित संसद् भवनमा बस्ने बैठकको कार्यसूचीमा उजुरी खोल्ने र सदस्यहरूलाई वितरण गर्ने उल्लेख छ।
प्रस्तावित व्यक्तिहरूले पेस गरेको कार्ययोजना पनि सदस्यहरूलाई बाँडिनेछ। उजुरी र कार्ययोजनाको अध्ययनपछि संसदीय सुनुवाइ प्रक्रिया अगाडि बढ्नेछ।
गत असार १९ गतेको संवैधानिक परिषद् बैठकले मानबहादुर कार्कीलाई प्रमुख निर्वाचन आयुक्तमा सिफारिस गरेको थियो। सोही बैठकले डा राजीव सुब्बा र गुरुप्रसाद वाग्लेलाई निर्वाचन आयुक्तमा नियुक्त गर्न सिफारिस गरेको थियो।
समितिको अनुमोदनपछि राष्ट्रपतिबाट नियुक्ति हुने संवैधानिक प्रावधान छ।
