बारा । नेपाली कांग्रेस बाराको पार्टी कार्यालय परिसरमा दुई समूहबीच झडप भएको छ। तत्कालीन सभापति राजेश राय यादव र कार्यवाहक सभापति मनोज भट्ट पक्षका कार्यकर्ताहरू कार्यालय सञ्चालनको विषयमा भिडेका हुन्।
केन्द्रीय अनुशासन विभागले यादवलाई कारबाही गरेपछि भट्ट कार्यवाहक सभापति बनेका थिए। बीपी कोइरालाको स्मृति दिवसको तयारीका लागि भट्ट समूहका कार्यकर्ता कार्यालय सरसफाइ गर्न पुग्दा विवाद सुरु भएको थियो।
भट्टले पार्टीको निर्णय र गगन थापाको निर्देशनमा जिम्मेवारी पाएको बताए। ‘पार्टीले मलाई कार्यवाहकको जिम्मेवारी दिएपछि आज कार्यालयको कागजपत्र र भवन बुझ्न पुगेका थियौँ,’ भट्टले भने, ‘तर उहाँहरूले कागजात दिन मानेनन्। विशेष महाधिवेशनबाहेक अरूलाई स्वीकार गर्दिनँ भन्दै भवन खाली गर्न अस्वीकार गरे।’
निवर्तमान सभापति राजेश राय यादवले आफू छलफलमा रहेकाले पछि कुरा गर्ने बताए।
कार्यालय प्रवेशमा रोकिएपछि दुवै पक्षबीच धकेलाधकेल र ढुङ्गामुढा भएको थियो। झडपमा केही कार्यकर्ता सामान्य घाइते भएका छन्। प्रत्यक्षदर्शीका अनुसार स्थिति तनावपूर्ण हुँदा पनि स्थानीय प्रशासन मौन बसेको थियो।
विवाद समाधानका लागि दुवै समूह पार्टी कार्यालयमा छलफल गरिरहेका छन्।
