रौतहटको फतुवा विजयपुर नगरपालिका–६ मन्जुरघाटस्थित अरुवा खोलामा नुहाउने क्रममा ९ वर्षीय शेख तमिनको डुबेर मृत्यु भएको छ। फतुवा विजयपुर–५ सन्तपुर टोलका शेख मुन्नाका छोरा तमिन शनिबार दिउँसो खोलामा डुबेका थिए।
जिल्ला प्रहरी कार्यालय रौतहटका प्रवक्ता डीएसपी वसन्त गौतमका अनुसार बालक दिउँसो करिब १ बजे खोलामा नुहाउन गएका थिए। नुहाउने क्रममा उनी डुबेको प्रहरीले जनाएको छ।
स्थानीयवासीले राति करिब ९ बजे इलाका प्रहरी कार्यालय सन्तपुर–लक्ष्मिनियालाई घटनाबारे जानकारी दिएका थिए। सूचना प्राप्त हुनासाथ प्रहरी टोली घटनास्थल पुगेको थियो। त्यसअघि नै स्थानीयवासीले बालकको शव खोलाबाट निकालेर सुरक्षित राखेका थिए।
मृतकको शव पोस्टमार्टमका लागि प्रादेशिक अस्पताल गौर पठाइएको थियो। आइतबार बिहान पोस्टमार्टम सम्पन्न भएपछि मृतकका फुपाजु शेख हसमुदिनले शव बुझेर अन्त्येष्टिका लागि लगेको प्रहरीले जनाएको छ।
प्रहरीले घटनाबारे थप अनुसन्धान भइरहेको जनाएको छ।
