धनुषाको विदेह नगरपालिका वडा नं. ५ का तत्कालीन वडाध्यक्ष विजय कुमार यादवले भारत सरकारले उपहारस्वरूप दिएको एम्बुलेन्स ३ वर्ष ५ महिनासम्म निजी सम्पत्ति सरह प्रयोग गरी भाडा असुलेको खुलासा भएको छ। भारतीय राजदूतावासबाट वडाबासीको निःशुल्क सेवाका लागि प्राप्त एम्बुलेन्स सरकारी कोषमा दर्ता नगरी भ्रष्टाचार गरेको अभियोगमा अख्तियार दुरुपयोग अनुसन्धान आयोगले यादवविरुद्ध विशेष अदालतमा मुद्दा दायर गरेको छ।
अख्तियारको अनुसन्धान अनुसार यादवले २०७७ असोज १४ गते भारतीय राजदूतावाससँग सम्झौता गरी वडाबासीका लागि निःशुल्क सेवा दिने गरी एम्बुलेन्स प्राप्त गरेका थिए। उनले उक्त एम्बुलेन्स वडा कार्यालयको जिन्सी विवरणमा आम्दानी नबाँधी आफ्नै नियन्त्रणमा राखेर निजी सवारी साधन जस्तै सञ्चालन गरेको अख्तियारले जनाएको छ।
३ वर्ष ५ महिनाको अवधिमा ३० हजार १८५ किलोमिटर गुडाइएको एम्बुलेन्सको सञ्चालन लगबुक, इन्धन खर्च र आम्दानीको कुनै आधिकारिक रेकर्ड राखिएको छैन। अख्तियारको जिकिर छ, यादवले व्यक्तिगत लाभका लागि प्रयोग गरेका हुन्।
नेपाल रेडक्रस सोसाइटी धनुषाको दररेट अनुसार कच्ची बाटोको भाडालाई आधार मान्दा यादवले १५ लाख ९ हजार २५० रुपैयाँ बराबरको सार्वजनिक सम्पत्ति हिनामिना र हानीनोक्सानी गरेको अख्तियारको ठहर छ।
अनुसन्धानका क्रममा कानुनी कारबाहीबाट जोगिन यादवले ३ लाख ८१ हजार ५९७ रुपैयाँ बुझाए। बाँकी ११ लाख २७ हजार ६५३ रुपैयाँ असुल उपर गर्नुपर्ने अख्तियारको भनाइ छ।
अख्तियारले पूर्व वडाध्यक्ष यादवलाई भ्रष्टाचार निवारण ऐन, २०५९ अन्तर्गत बिगो बमोजिम जरिवाना, कैद सजाय र बाँकी बिगो असुल उपर गर्न मागदाबी गरेको छ। आयोगका प्रवक्ता सुरेश न्यौपानेले मंगलबार विशेष अदालत काठमाडौँमा आरोपपत्र दायर भएको जानकारी दिए।
