कपिलवस्तुका पूर्वमेयर ६५ वर्षीय किरण सिंह शुक्रबारदेखि सम्पर्कविहीन भएका छन्। उनको मोटरसाइकल गोरुसिङ्गे जंगलमा फेला परेको छ, तर व्यक्ति अझै भेटिएका छैनन्।
सिंह चढ्ने गरेको लु. प्र. ०१०१३ प ७९७० नम्बरको मोटरसाइकल पूर्व–पश्चिम राजमार्गबाट करिब ८ किलोमिटर भित्र रोकिराखेको अवस्थामा भेटिएको थियो। उनको खोजीमा तालिमप्राप्त कुकुरसहित ८० भन्दा बढी प्रहरी र स्थानीय परिचालन गरिएको कपिलवस्तु प्रहरी प्रमुख एसपी मनोहर भट्टले जानकारी दिए।
प्रहरीका अनुसार शुक्रबार बिहान सिंह कपिलवस्तु नगरपालिका–३ स्थित घरबाट निर्माणाधीन कृषि फार्म जाने भन्दै मोटरसाइकलमा निस्किएका थिए। प्रमुख जिल्ला अधिकारी जनार्दन गौतमका अनुसार सीसीटिभी फुटेजमा उनी शुक्रबार दिउँसो करिब सवा तीन बजेतिर रामराज पुलसम्म पुगेको देखिएको छ।
त्यसपछि सिंहको मोबाइलबाट आफन्तलाई ‘मैले जंगलमा बाटो बिर्सिएँ’ भन्ने सन्देश आएको थियो। प्रहरीकहाँ भने शुक्रबार साँझ करिब ६ बजेतिर मात्रै उनी हराएको खबर पुगेको थियो। कल डिटेल लगायतका विवरणका आधारमा समेत खोजी र अनुसन्धान भइरहेको प्रमुख जिल्ला अधिकारी गौतमले बताए।
विराटनगर स्थायी घर भएका सिंह लामो समयदेखि परिवारसहित कपिलवस्तु नगरपालिका–३ मा बस्दै आएका थिए। उनी अघिल्लो कार्यकालमा कांग्रेसबाट कपिलवस्तु नगरपालिकाको मेयरमा निर्वाचित भएका थिए।
