डिभिजन वन कार्यालय गाईघाट, उदयपुरका सातौं तहका अधिकृत भुवन पौडेल १६ हजार २५० रुपैयाँ घुससहित पक्राउ परेका छन्। अख्तियार दुरुपयोग अनुसन्धान आयोगको टोलीले पौडेललाई बिहीबार दिउँसो रंगेहात नियन्त्रणमा लिएको हो।
विशेष सूचनाका आधारमा अख्तियारको टोलीले पौडेललाई एक सामुदायिक वन उपभोक्ता समूहबाट लिएको रकमसहित पक्राउ गरेको जिल्ला प्रशासन कार्यालय उदयपुरले जनाएको छ।
उदयपुरका प्रमुख जिल्ला अधिकारी मेखबहादुर मंग्रातीले पौडेललाई नगदसहित पक्राउ गरिएको पुष्टि गरे। ‘अख्तियारको टोलीले दिएको जानकारीअनुसार उहाँ नगदसहित पक्राउ पर्नुभएको हो,’ प्रजिअ मंग्रातीले भने।
प्रजिअ मंग्रातीका अनुसार अब अन्य कर्मचारीमाथि पनि अनुसन्धान हुनेछ।
