रौतहटको देवाही गोनाही नगरपालिका ७ स्थित माबी प्रेमपुर गोनाहीका शिक्षक र विद्यार्थीले भोटेकोशी बाढीपीडितका लागि आफ्नो खाजा खर्च कटाएर सहयोग गरेका छन्। यो अभियान सामाजिक सञ्जालमा भाइरल बनेको छ।
गत असार १० गते आएको विनाशकारी बाढीले सयौँ परिवारको घर बगाएको, आफन्त गुमाएका र व्यापार व्यवसाय ठप्प पारेको छ। यस्तो विपत्तिमा प्रधानमन्त्री राहत कोषमा सहयोग जुटिरहेका बेला यस विद्यालयका शिक्षक र विद्यार्थीले देखाएको मानवीय भावनाले सबैको ध्यान तानेको छ।
विद्यालयका प्रधानाध्यापक मुकेश कुमार यादवले ‘हिमाल, पहाड वा तराई जहाँको भए पनि हामी नेपाली हौँ। नेपालीलाई दुःख पर्दा हामी सबै एक ठाउँमा उभिनुपर्छ’ भन्ने भनाइले शिक्षकहरूलाई प्रेरित गरेको बताए। यसै प्रेरणाले १९ जना शिक्षक मध्ये १४ जनाले स्वेच्छाले १ हजारदेखि २ हजार रुपैयाँसम्म सहयोग रकम जम्मा गरे।
शिक्षकहरूले कक्षामा बाढीको पीडा सुनाएपछि कक्षा ९ का २६ जना विद्यार्थीले खाजा खान ल्याएको पैसाबाट १०, २० र ५० रुपैयाँ जम्मा गरी ४७० रुपैयाँ सहयोग गरेका छन्। यसैगरी कक्षा ११ का विद्यार्थीले पनि खाजा खर्च कटाएर ४०० रुपैयाँ जम्मा गरेका छन्।
विद्यालयका निमावि शिक्षक निरञ्जन यादवको पहलमा यो अभियान सुरु भएको थियो। विद्यार्थीहरूले जम्मा गरेको रकमको सूची सामाजिक सञ्जाल फेसबुकमा पोस्ट भएपछि हजारौँले यसलाई शेयर गर्दै विद्यार्थी र शिक्षकहरूको प्रशंसा गरेका छन्।
यस अभियानले रकमको आकारभन्दा भावना ठूलो हुने सन्देश दिएको छ। यी विद्यार्थीहरूले आफ्नो सानो खुसी त्यागेर पीडित परिवारका लागि मानवताको ठूलो उदाहरण प्रस्तुत गरेका छन्।
यसैबीच, वीरगन्ज हेल्थ केयर अस्पतालले रसुवासहितका बाढी पहिरो प्रभावित नागरिकको सहयोगका लागि प्रधानमन्त्री दैवीप्रकोप उद्धार कोषमा १० लाख रुपैयाँ आर्थिक सहयोग गरेको छ। अस्पतालका अध्यक्ष अबुलहैस अन्सारीले पर्सा क्षेत्र नम्बर १ का सांसद हरि पन्तमार्फत उक्त रकम हस्तान्तरण गरेका हुन्।
नेपाल टेलिकमले पनि बाढी प्रभावित क्षेत्र त्रिशूली-३ ‘ए’ र तुप्चेमा मोबाइल सेवा पुनः सञ्चालनमा ल्याएको छ। यसले जलविद्युत् आयोजनाको सुरुङ उद्धार कार्यमा सञ्चार सम्पर्क सहज बनाएको छ।
