रसुवाको भोटेकोशी र त्रिशूली नदीमा भदौ १० गते आएको विनाशकारी बाढीपछि १२ दिनसम्म पनि खोज, उद्धार तथा राहत कार्य जारी छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार १३४२ जनाको शव फेला परिसकेको छ।
प्राधिकरणकी प्रवक्ता शान्ति महतले नेपाली सेना, सशस्त्र प्रहरी, नेपाल प्रहरी, प्राविधिक टोली र विदेशी विज्ञ उद्धारमा खटिएको बताइन्। जलविद्युत आयोजनाका सुरुङमा समेत खोजी जारी छ। त्रिशूली–३ ‘ए’ सुरुङमा १६० मिटर, त्रिशूली–३ ‘बी’ मा ३० मिटर, रसुवागढीमा २७५ मिटर, लाङटाङमा १५० मिटर र चिलिमेमा १७० मिटरसम्म खोजी भएको छ। अपर त्रिशूली–१ मा टनेल हेडदेखि टेलसम्म खोजी जारी छ।
अपर त्रिशूली–१ को अडिट–३ मा इन्फ्रारेड तथा थर्मल ड्रोनबाट खोजी गर्दा जीवित व्यक्तिको संकेत नमिलेपछि चिनियाँ टोली फर्किएको प्राधिकरणले Nmkhabarलाई पुष्टि गर्यो। सेनाका ग्राउन्ड फोर्स र पेट्रोल टोली परिचालन गरिएको छ। सशस्त्र र नेपाल प्रहरीका केनाइन टोली पनि खटिएका छन्। नेपाल प्रहरीले ड्रोनमार्फत खोला किनारको अवस्थाबारे विवरण संकलन गरिरहेको छ।
विदेशी पर्यटकको उद्धार र बेपत्ता आफन्तको खोजीमा पर्यटक प्रहरी खटिएको छ। यातायात सुचारु गर्न सडक मर्मत र सफाइ भइरहेको छ। देवीघाटको तादी खोलामा अस्थायी पुल जडान जारी छ। गल्छी–देवीघाट सडकखण्डको ठूली खोला नजिक लेदो हटाउने काम भइरहेको छ। देवीघाट–ढुङ्गे सडकखण्ड सञ्चालनमा आएको छ।
विदुर–बेत्रावती सडकखण्डको १० किलोमिटरमध्ये ८ किलोमिटर सञ्चालनमा आएको छ। फेला परेका १३४२ शवमध्ये ९८ जनाको सनाखत गरी परिवारलाई बुझाइएको छ। शव पहिचानका लागि सबैको डीएनए नमुना संकलन भइरहेको छ। सम्पर्कविहीन व्यक्तिका परिवारलाई पनि डीएनए नमुना दिन आग्रह गरिएको छ।
प्रभावित क्षेत्रमा अत्यावश्यक सेवा पुनः सञ्चालन गरी जनजीवन सामान्य बनाउने प्रयास भइरहेको छ। सञ्चार सेवा लगभग सुचारु भएको छ। विद्युत् सेवा पनि धेरै स्थानमा पुनः सञ्चालनमा आएको छ।
खोज, उद्धार र राहतबारे समीक्षा गर्न भूमि व्यवस्था मन्त्री र स्वास्थ्य मन्त्रीको उपस्थितिमा विपद् कार्यकारी समितिको बैठक बसेको थियो। विषयगत निकायका क्लस्टर लिड र परिचालित टोलीबीच संयुक्त बैठक पनि सम्पन्न भएको छ।
