१२ दिनदेखि माइतीघरमा बाढीपीडितको अनिश्चित पर्खाइ
रसुवाको बाढीले सुरुङमार्गमा हराएका आफन्तको खोजीमा ढिलाइ भएको भन्दै पीडित परिवार १२ दिनदेखि माइतीघर मण्डलामा अनिश्चित पर्खाइमा छन्। उनीहरूको आँखामा आशा र निराशाका भाव प्रस्ट देखिन्छ।
घरमा बसेर खबर कुरेर साध्य नभएपछि उनीहरू सडकमा आएका हुन्। उनीहरूको मुख्य माग छिटोभन्दा छिटो उद्धार कार्य सुरु होस्। दिन बित्दै जाँदा चिन्ता थपिँदै गएको छ।
खोजी कार्यमा ढिलाइ भएको भन्दै पीडित परिवारले सरकार र सम्बन्धित निकायसँग पहल गरे पनि ठोस प्रगति नभएको गुनासो गरेका छन्। उनीहरूले हराएका आफन्तको खोजी कार्यलाई तीव्रता दिन माग गरेका छन्।
माइतीघर मण्डलामा बसेका पीडित परिवारले अबको केही दिनभित्र उद्धार सुरु नभए थप आन्दोलनका कार्यक्रम घोषणा गर्ने चेतावनी दिएका छन्। उनीहरूले सकुशल उद्धार नहुँदासम्म आन्दोलन जारी राख्ने बताएका छन्।
