भोटेकोशी नदीको बाढीले रसुवामा ६७७ यातायात मजदुर सम्पर्कविहीन बनाएको छ। ५१५ ट्रक तथा कन्टेनर हराएको नेपाल ट्रक यातायात व्यवसायी महासङ्घले जनाएको छ।
महासङ्घले यातायात व्यवस्था विभागका महानिर्देशक राजीव पोखरेल संयोजकत्वको बैठकमा यो विवरण प्रस्तुत गरेको थियो। सम्पर्कविहीन मजदुर र हराएका सवारी साधनको सङ्ख्या अझै बढ्न सक्ने महासङ्घको भनाइ छ।
पूर्वाधार विकास मन्त्रालयले बाढीको क्षतिको मूल्याङ्कन गर्न समिति गठन गरेको छ। यातायात व्यवस्था विभागका महानिर्देशक पोखरेल समितिको संयोजक तोकिएका छन्।
समितिलाई १५ दिनभित्र रायसहितको प्रतिवेदन पेस गर्न जिम्मेवारी दिइएको छ। समितिको सदस्यमा पूर्वाधार विकास मन्त्रालय र मन्त्रीको सचिवालयका प्रतिनिधि छन्। यातायात व्यवसायी र मजदुर सङ्घका प्रतिनिधि पनि सदस्य छन्। महासङ्घका अध्यक्ष राजेन्द्रविक्रम बानियाँ र महासचिव बद्रीप्रसाद चौलागाईं सदस्य छन्।
