जीतपुरसिमरा उपमहानगरपालिका–१९ इनर्वासिरामा छ वर्षीया बालिकालाई बलात्कार गरेको आरोपमा पक्राउ परेका ७० वर्षीय हामजा देवानलाई स्थानीयले प्रहरीबाट खोस्ने प्रयास गर्दा बिहीबार राति प्रहरीसँग झडप भएको छ। स्थानीयको भीडले प्रहरी चौकी घेराउ गरी देवानलाई बाहिर निकालेर शरीरमा आगो लगाउने माग गरेको थियो। स्थिति तनावग्रस्त बनेपछि प्रहरीले सामान्य बल प्रयोग गरी देवानलाई इलाका प्रहरी कार्यालय सिमरामा ल्याएको छ।
इलाका प्रहरी कार्यालय सिमराका प्रमुख प्रहरी नायब उपरीक्षक दयाकृष्ण भट्टका अनुसार झडपमा प्रहरीका एक सई घाइते भएका छन्। प्रहरीको गाडीमा ढुंगा प्रहार गरी क्षति पुर्याइएको छ। केही स्थानीयहरू पनि घाइते भएको जनाइएको छ। स्थानीयले कानुन हातमा लिन खोजेपछि प्रहरीले राति १०:३० बजेतिर देवानलाई सुरक्षित रूपमा प्रहरी कार्यालयमा सार्न सफल भएको भट्टले बताए।
यस्तै, रौतहटबाट प्राप्त समाचारअनुसार बाराकै जीतपुरसिमरा उपमहानगरपालिका–१९ इनर्वाशिरामा ५ वर्षीया बालिकामाथि पटक–पटक बलात्कार गरेको आरोपमा करिब ६५ वर्षीय असम्जान मियाँ पक्राउ परेका छन्। उनलाई इलाका प्रहरी कार्यालय सिमराको हिरासतमा राखिएको छ। मियाँलाई प्रहरी चौकीमा ल्याएपछि आक्रोशित स्थानीयले राति प्रहरी चौकी घेराउ गरी आरोपीलाई कडा कारबाहीको माग गर्दै प्रदर्शन गरेका थिए। प्रहरीले कानुनी प्रक्रियाअनुसार अनुसन्धान अघि बढाएको जनाएको छ। उक्त क्षेत्रमा सुरक्षा व्यवस्था कडा पारिएको छ।
