मेचीनगर नगरपालिकामा जापानी इन्सेफलाइटिस (JE) विरुद्धको खोप अभियान असोज ५ गतेदेखि सुरु हुनेछ। ३० वर्षभन्दा माथिका सबै नागरिकलाई लक्षित गरी यो अभियान सञ्चालन गरिनेछ।
पालिकाका लागि ६५ हजार ५२५ भाइल खोप आइपुगेको छ। १५ वटै वडाका खोप केन्द्रमा तयारी पूरा भएको मेचीनगर स्वास्थ्य शाखाकी प्रमुख सविता सापकोटाले जानकारी दिइन्। झापा जिल्लास्तरीय खोप अभियानको उद्घाटन मेचीनगर-६ स्थित काँकरभिट्टा स्वास्थ्यचौकीमा हुनेछ।
चालु आर्थिक वर्षमा मेचीनगरमा छ जनामा JE संक्रमण पुष्टि भएकोमा दुई जनाको मृत्यु भइसकेको छ। गत आर्थिक वर्ष २०८१-८२ र २०८२-८३ मा पनि दुई जनाको यस रोगबाट मृत्यु भएको थियो। भारतको पश्चिम बङ्गाल र बिहार प्रान्तसँग सीमा जोडिएकाले मेचीनगरलाई JE को संक्रमणका लागि संवेदनशील क्षेत्र मानिएको छ।
रोगको संक्रमण मेचीनगरका पाँचवटा वडामा देखिएको छ। खोप केन्द्रसम्म ज्येष्ठ नागरिकलाई ल्याउन सिटी सफारी र टेम्पोको प्रयोग गरिने व्यवस्था मिलाइएको मेचीनगर-७ का वडाध्यक्ष प्रह्लादमणि ओलीले बताए।
स्वास्थ्य कार्यालय झापाका प्रमुख वृजकुमार दासका अनुसार, झापा जिल्लामा चालु आर्थिक वर्षभित्र १३ जनामा JE संक्रमण पुष्टि भएको छ। तीमध्ये सात जनाको मृत्यु भएको छ।
