काठमाडौं। नेपाल राष्ट्र बैंकले नियमन, सुपरिवेक्षण, कानुन कार्यान्वयन र अभियोजन निकायबीच सहकार्य र समन्वयमा जोड दिएको छ। राष्ट्र बैंकले अधिकारीहरूको उपस्थितिमा अन्तर्क्रिया गरी सहकार्यको आवश्यकता औंल्याएको हो।
गभर्नर डा. विश्व पौडेलले वित्तीय सुशासन राष्ट्र बैंकसहित सबै निकायको साझा सरोकारको विषय भएको बताए। उनले ‘सिङ्गो सरकारी संयन्त्रको दृष्टिकोण’ अपनाई साझा दिशा निर्धारण गर्नुपर्नेमा जोड दिए। स्रोत–साधनमा गलत व्यक्तिको हात पुग्न नदिन राज्यका निकाय सजग हुनुपर्ने उनको भनाइ थियो।
महान्यायाधिवक्ता डा. नारायणदत्त कडेलले कानुनका समस्या र सुधारबारे मन्त्रालयस्तरमा अध्ययन भइरहेको जानकारी दिए। उनले वित्तीय अपराधविरुद्ध महान्यायाधिवक्ता कार्यालय सक्रिय रहने बताए।
प्रहरी महानिरीक्षक दानबहादुर कार्कीले वित्तीय अपराध नियन्त्रण संयुक्त प्रयासबाट मात्र सम्भव हुने बताए। पछिल्ला वर्षमा वित्तीय अपराधको संख्या र जटिलता बढेको उनले सुनाए। उनले वित्तीय अपराध अनुसन्धानलाई प्राथमिकतामा राखिएको जानकारी दिए।
