रसुवा र नुवाकोट जिल्लामा बाढीले क्षति पुर्याएका झोलुङ्गे पुलहरूको मर्मत तथा नयाँ तुइन निर्माण कार्यले तीव्रता पाएको छ। यसले सडक सञ्जालबाट विच्छेद भएका गाउँबस्तीहरूमा पुनः आवागमन सुचारु गर्न सरकारले पहल गरिरहेको छ।
नुवाकोटको बेलकोटगढीस्थित पिमलटार-जागाराम झोलुङ्गे पुलको मर्मत कार्य सकिएको छ। आगामी दुई दिनभित्र सर्वसाधारणका लागि खुला गरिनेछ। पूर्वाधार विकास मन्त्रालय, सस्पेन्सन ब्रिज डिभिजन ललितपुरले पुलको लठ्ठा सीधा गर्ने, ह्यान्डरेल केबुल फेर्ने तथा नयाँ स्टिल डेक र बिम जडानको काम सम्पन्न गरेको छ। सुरक्षा जाली लगाउनेबित्तिकै पुल सञ्चालनमा आउनेछ।
बाढी प्रभावित नागरिकको तत्काल उद्धार र दैनिक आवतजावतलाई सहज बनाउन चारवटा तुइन निर्माण गरी सञ्चालनमा ल्याइसकिएको छ। नुवाकोटको इन्द्रेणीचौर र गुम्बाडाँडा जोड्ने त्रिशूली नदीमा मोटरयुक्त तुइन सञ्चालनमा छ। विदुर-५ देवीघाटमा पनि तुइन चालु भइसकेको छ। रसुवाको गोसाइँकुण्ड गाउँपालिकास्थित स्याफ्रुबेँसी-चिलिमे र हाकुबेँसीमा पनि तुइन सञ्चालनमा आइसकेका छन्।
यसबाहेक रसुवा र नुवाकोट जोड्ने पैरेबेँसी, स्याफ्रुबेँसी-लाङटाङ र रुङ्गामा थप तीनवटा तुइन जडानका लागि आवश्यक तयारी र स्थलगत अध्ययन भइरहेको छ।
बाढीले क्षतिग्रस्त बनाएका १३ वटा झोलुङ्गे पुलको मर्मत कार्य अन्तिम चरणमा छ। यसमा धादिङका कालिकास्थान, मालिङ्गा-मझुवाटार, महेशदोभान, चिरौंदी खोला, शीतलबजार-क्यूरेनीटार, बेल्खु-भुतिया र महादेवस्थान पुलहरू छन्।
नुवाकोट र धादिङ जोड्ने केउरेनी-गहते, फोस्रेटार, तारकेश्वर र बेलकोटगढी जोड्ने पिमलटार-जागाराम पुल मर्मतको अन्तिम तयारीमा छन्। नुवाकोटको जिलिङ तथा गोरखा र धादिङ जोड्ने बादरे र धवादीघाट झोलुङ्गे पुलको पनि मर्मत अन्तिम चरणमा छ।
बाढीबाट क्षतिग्रस्त अन्य सातवटा झोलुङ्गे पुलको मर्मत कार्य पनि थालिएको छ। पहिलो चरणको स्टिल पार्ट्स खरिद सम्पन्न भइसकेको छ। दोस्रो चरणका लागि सम्झौता भइसकेको छ।
बाढीले पूर्ण रूपमा बगाएर क्षति पुर्याएका ३३ वटा झोलुङ्गे पुलको स्थायी पुनर्निर्माणका लागि विस्तृत परियोजना प्रतिवेदन (डीपीआर) तयार गर्ने कार्य अन्तिम चरणमा पुगेको मन्त्रालयले जनाएको छ।
