नेकपा एमालेको तेस्रो केन्द्रीय कमिटी बैठकले पार्टी अध्यक्षको राजनीतिक प्रतिवेदनसहित ९ एजेण्डामा छलफल गर्नेछ। सोमबार सुरु भएको बैठकमा सोमबार अध्यक्ष केपी शर्मा ओलीले राजनीतिक प्रतिवेदन पेस गरेका थिए।
बैठकमा केन्द्रीय कमिटीमा मनोनयन, विभागहरूको गठन, पोलिटब्युरो, स्थायी कमिटी, सल्लाहकार परिषद्, ज्येष्ठ कम्युनिस्ट मञ्च र अनुशासन आयोग गठनका साथै समसामयिक प्रस्तावमाथि छलफल हुनेछ। एमाले प्रचार विभाग प्रमुख निरज आचार्यले यी एजेण्डा प्रस्तुत गरिएको जानकारी दिए।
बैठकका निर्णय र छलफललाई अभिलेख गर्न माइन्युट लेखन समिति गठन गरिएको छ। उपाध्यक्षद्वय विष्णुप्रसाद पौडेल, गोकर्ण विष्ट र महासचिव शंकर पोखरेललाई माइन्युट लेखनको जिम्मेवारी दिइएको छ।
बैठकमा उठेका विषय र बहस समेट्न बहस नोट कमिटी बनाइएको छ। उपमहासचिव योगेश भट्टराई, सचिव पद्मा अर्याल, केन्द्रीय सदस्यहरू सूर्य थापा, निरज आचार्य र खिमलाल भट्टराईलाई बहस नोट तयार गर्ने जिम्मेवारी तोकिएको छ।
मंगलबारको बैठकमा केन्द्रीय सदस्यहरूले अध्यक्ष ओलीको प्रतिवेदनमाथि तीन/तीन मिनेटको समय लिएर सुझाव दिनेछन्। बैठक ललितपुरको भनीमण्डलस्थित रामवाग पार्टी प्यालेसमा बिहान ९ः०० बजे बस्नेछ।
गत फागुनमा सम्पन्न प्रतिनिधिसभा निर्वाचनपछि पार्टीको यो पहिलो केन्द्रीय कमिटी बैठक हो। बैठक असोज ७ गतेसम्म सञ्चालन हुनेछ।
