इलाम र सुनसरीका फरक–फरक स्थानबाट प्रहरीले करिब एक हजार नौ सय ५४ किलोग्राम अवैध लागूऔषध गाँजा बरामद गरेको छ। प्रहरीले गाँजा तस्करीमा प्रयोग भएका ट्रक र एम्बुलेन्स नियन्त्रणमा लिएको छ।
इलामको इलाम नगरपालिका–९ भञ्ज्याङबाट प्रहरीले करिब एक हजार पाँच सय चार किलोग्राम ६ सय १० ग्राम गाँजा बरामद गर्यो। प्रहरी चौकी गोलाखर्कको टोलीले ना.४ ख ८९९६ नम्बरको ट्रक जाँच गर्दा चालक गाडी छाडेर फरार भए।
ट्रकको तलासी लिँदा ४१ बोरामा उक्त गाँजा फेला परेको थियो। मेची राजमार्गको उक्त स्थानबाट प्रहरीले १५ क्विन्टल गाँजा बरामद गरेको हो।
जिल्ला प्रहरी कार्यालयका एसपी कुलदीप चन्दका अनुसार, ट्रकको डालीमा फल्स बटम बनाएर गाँजा लोड गरिएको थियो। चालकले ‘गाडीमा प्राविधिक समस्या आयो’ भन्दै निस्किएर फरार भएका थिए।
त्यस्तै सुनसरीको इटहरी उपमहानगरपालिका–२० तरहराबाट करिब चार सय ५० किलोग्राम गाँजा बरामद भयो। प्रहरी चौकी तरहराको टोलीले बेवारिसे बा.२ च ९५७३ नम्बरको एम्बुलेन्स जाँच गर्दा १५ पोकामा गाँजा फेला पारेको हो।
फरार चालकहरूको खोजी जारी छ। प्रहरीले आवश्यक अनुसन्धान अघि बढाएको छ। पहाडी जिल्लाबाट तराई वा भारततिर गाँजा लैजान यो बाटो प्रयोग भएको हुनसक्ने प्रहरीको अनुमान छ।
